Vawiin khan Chief Secretary Pi L. Tochhong hovin Secretariat Conference Hall, New Secretariat Complex-ah Mizoram sorkar department hrang hrang Secretary leh Heads of Department ten meeting an nei a. Lunglei High Powered Committee Vice-Chairman Pu Joseph Lalhimpuia leh sorkar laipui Ministry of Finance, Economic Affairs Department-a Deputy Secretary Pu C.Vanlalramsanga te pawh an tel a ni.
Pi L.Tochhong chuan Prime Minister HD Deve Gowda hunlai atang tawha hmarchhak bial hmasawnna atana sum thahnem tak, 10% Lumpsum Grant sorkar laipui Ministry tin ten kum tin an dah hran thin dan a chinchhuakin meeting-ah hian a hrilhfiah hmasa a. Mizoram sorkarin a chhawr tangkai dan tur nasa lehzuala ngaihven a tul hle tiin hei hi Centrally Sponsored Scheme nen thil hrang daih, hmarchhak State te tana a bika bithliah a ni, a ti. Mizoram sorkar hnuaia department ten he sum an chhawr tangkai ve ngei theih nan theihtawp chhuaha tanla turin department tin aiawh te a chah a. He sum hmuchhuak tura department hrang hrang te hma lo lak tawh dan leh hma chhawpte ngaithla in harsatna an neih te sutkian dan tur meeting-ah hian sawiho a ni.
Lunglei High Powered Committee nimina Chief Minister hova thukhawmin North East tana dah 10% lumpsum grant haichhuak tura Special Development Initiative for Lunglei District siam chungchang pawh he meeting-ah hian sawi a ni a. Special Development Initiative for Lunglei District tan hian Core Group din nghal niin Pu Joseph Lalhimpuia, Vice Chairman HPC chu Chairman-ah ruat a ni a; Working Chairman atan Chief Secretary Pi L.Tochhong; Member Secretary atan Principal Secretary to Chief Minister Pu Lalramthanga ruat niin member dang te chu Lok Sabha MP Pu C.L. Ruala, Principal Adviser T.P. Khaun, Principal Adviser-cum-Ex Officio Addl.Secretary Planning & Programme Implementation Pu Ngunlala Chinzah, Deputy Adviser State Planning Board Pu Lalchhuanawma Hrahsel, Joint Director UD&PA Pu Vanlalmawia, Deputy Secretary Finance Pu C.C. Lalchuangkima, State Planning Board Sr. Research Officer Dr.Lalrinchhana leh HPC Lunglei Chief Planning Officer te an ni ang a. An hnathawh tur tlangpui (terms of reference) pawh duan tan nghal a ni. Development Department tin te chu sorkar laipuia an Ministry theuh te ngaihpawimawh zawng, thrust area mila concept paper buatsaih tura hriattir niin September thla chhungin Core Group-ah thehlut hman ngei tura tih an ni.
