Vawiin khan D.C’s Conference Hall, Mamit-ah kumin 2012-a Faina Hapta, Mahatma Gandhi piancham denchhena 2nd - 9th Oct 2012 a hman dan tur rel a ni a. He meeting hi Pu V. Lalremthanga, M.C.S District Bawrhsapin a kaihruai a ni.

District Bawrhsap chuan faina kawngah mizote hi kan la hniam em em a, theihtawp chhuaha mahni theihna zawn theuhvah hma kan lak a tul a ni a ti a. He faina hapta kan hman tur pawh hi mitinte’n a bul kan tanna atana hmang theuh turin mipuite a chah bawk a ni.

Kumin faina Hapta 2nd-9th Oct 2012 chhunga hmanna turah hian Mamit khawpui mai bakah District chhung Sub-Division leh Block Level ah hmang ve tura ngen ni se, 2nd October zing karah Mamit khawpui chhung a V/C leh YMA ten an remchan dan anga hawnna hun buatsaih ni se, Faina kawnga inelna kawng hrang hrang, vengfai (YMA wise), Zirna In fai, Office leh Compound Fai, Hotel/ Restaurant/ Tea Stall, Canteen Fai, Chanchinbu a faina thu ziak tha leh mimal in leh compound faiah te buatsaih ni se tih te rel a ni. Heng inelna hrang hranga endiktu turte meetingah hian siam nghal a ni bawk.

Faina Hapta kharna hun hi Dt 9th Oct 2012 chhun dar 12:00 ah Chhim Veng YMA Hall, Mamit-ah urhsun taka buatsaih tura ruahman niin he hunah hian lawmman te hi sem a ni bawk dawn a ni.

He Meeting-ah hian Department hrang hrang hotute leh khawtlang aiawhte leh chanchinbumite an tel tha hle a ni.