Vawiin chawhnu dar 1:30 khan Champhai Venglai Community Hall ah Teachers Day vawi 51-na Zirtirtu te puala inhmuhkhawmna programme pawimawh tak neih a niin Primary, Middle leh High School zirtirtu te an kal tha hle a. Pu.T.T.Zothansanga, MLA Champhai North chu khuallian niin, Champhai DC Pu.Vijay Kumar Bidhuri IAS chu Khual zahawm a ni.

Khuallian Pu.T.T.Zothansanga chuan thu sawiin sikul leh college te chu kan ram hruaitu, sakhaw rawngbawl tu leh puitling la ni tur mi hrang hrang te tuai hriamna tur hmun a nih avangin zirtirtute mawhphurhna leh inpekna a pawimawh thu sawiin Ram mipui te changkanna leh an rilru chu zirna “Education “ a ni zel a ni tiin zirlai ten Mizoram pawn leh India ram pawn thlenga lehkha zir tur a Mizoram an tlanchhiatsan nasat avangin kum tin crore khat aia tam pawisa hi ram pawn ah zirna atan kan thawn chhuak thin a , hei hi a uihawm hle mai a, kan ram education chhiat vang a ni thei angem , hmun dang pan ngai lo hian kan ram zirna hi chhenfakawm ni turin zirtirtu ten tan I la thar leh ang u a ti .

Zirna sikula hotu tha leh zirtirtu tha te chu an sikul hmel ah a lang ngei ngei thin a ni tiin Pu.T.T.Zothansanga chuan strict lo, zaidam, nelawm leh fak duhna, hmingthat duh lutukna avangin sikul a awngrawp telh telh thei a, zirlaite pawh fel fai taka pass lo te chu mahni in hmuhhniam na (Inferiority complex )an nei awl bik a ni a ti a. Discipline leh Punctuality zirtirtu tan a pawimawh em em a, naupang te mi puitling tha taka chher chhuak tur in kan beisei em em che u a ni a ti.

Champhaia Teachers Day hmanna ah hian District Bawrhsap Pu Vijay Kumar Bidhuri pawhin thu sawiin Naupangte zirna kawngah zirtirtute an pawimawh, chuvang chuan entawn tlaka an awm a ngai a, naupang te thunun thei turin zirtirtu chu thil tha lo hrang hrang lak atangin an invawng thianghlim thei tur ani tiin RMSA leh SSA vangin kan ram ah zirna in hma a sawn phah nasa hle a, a lawmawm em em a ni “Zirtir tute hian kan tan thil ropui tak min tih sak a, I chawimawi zel ang u” a ti.