Mizoram Sorkar (Police, Excise & Narcotics) leh Central YMA chuan ruihhlo thawhhona ruihhlo do kawnga thawhhona thuthlung vawiin khan Vanapa Hall-ah an ziak. He hunah hian Home, Excise & Narcotics, etc. changtu Minister Pu R. Lalzirliana chu khuallian a ni.
Khuallian chuan Mizoram Police leh Excise-te chu state dangte nen khaikhin pawhin misual man kawngah an aia tha bik an awmloh hun sawiin, hei hi mipui leh tlawmngai pawlte nena thawhhona tha an neih avang a ni, a ti a. Ruihhlo tihrem hi harsa hle mahse kan hnam tibuaitu a nih miau avangin hna dang thulh pawha ram humhim nan ruihhlo do hna hi kan thawk mai tur a ni, tiin, Sorkar leh Central YMA in hemi kawnga lungrual taka thawk dun tura thuthlung ziah a ni chu lawmawm a tih thu a sawi. Pu R. Lalzirliana chuan ruihhlo zuartute hi ram leh hman hmelma an nih thu sawiin, dan lova damdawi leh ruihhlo zuarte chu “rang taka inthiarfihlim” turin leh, man an nih vaih chuan an chunga thleng tur chu anmahni mawh a nih tur thu a sawi a. Dan bawhchhia te chu dim an nih loh tur thu sawiin, milian leh mite, mi hausa leh rethei tumah thliar bik nei lovin an thil tihsual ang zela an chungthu ngaihtuah anih tur thu leh, Dan kengkawhtute pawh huaisen taka an hna thawk turin a chah a. Chutihrual chuan fimkhur a pawimawh thu te, Dan hrechiang lova mahni duh anga hmalak ve ngawt a fuh berloh thu te leh, sakhuana nen nun kawng dik zawka inhruailuh tum a tan ho a pawimawh thu a tarlang bawk.
Home Minister tlawmngai pawlten thahnemngai taka sual do hna thawka an vahchhuah naah Sorkar laka sum leh pai an beisei ngailo chu lawmawm a tih thu sawiin, chutihrual chuan an hnathawhnaah hian sum mamawhna tam tak a awm thin tih hriatpuiin Sorkar chuan ruihhlo dona atan hian cheng nuai 30 a sanction thu a tarlang a. Excise & Narcotics Department tan an Budget pangngai bakah cheng nuai 30 vek leh, Police Department tan cheng nuai 70 sanction anih thu a tarlang bawk.
Vawiin Ruihhlo Do beihpui thlakna hi Aizawl bakah District hrang hrang YMA awmna tawh phawtah neih a ni a. Vanapa Hall-a inkhawm hi CYMA President Pu Vanlalruata’n kaihruaiin, Mizoram Police aiawhin DGP Pu Thianghlima, IPS; Excise & Narcotics Department aiawhin Pu Lalhmunsanga, Commissioner leh Central YMA aiawhin President Pu Lalbiakzuala ten thu an sawi a. Aizawl khawpui huamchhunga Branch YMA hrang hrang 99 hnenah Citation leh ngaihhruihna thilpek (torch-light) hlan a ni bawk.
Vanapa Hall programme zawh hian 3rd Battalion MAP Hqrs, Mualpui ah Court phalna anga ruihhlo man thenkhat Home Minister ho hian halral a ni a. Heng ruihhlo hrang hrang te hi a vaiin quintal 50.5 vel a rit niin, Heroin 1.64kg, Methamphetamine tablet nuai 10 vel, Pseudoephedrine vbc 1 leh a chanve chuang, Cannabis 150 kg bakah codeine bottle engemaw zat a tel a, a vai hian cheng vbc 1.21 chuang hu a ni.
Central YMA hruaitute chuan tuna ruihhlo do kawnga an hnathawh kalphungah chuan a damdawi vai a tih tlem, “supply reduction” zawnga kalpui anih thu leh, ruihhlo mamawhna leh pawikhawihna titlem turin (demand reduction leh harm reduction) hmalak zel anih tur thu te, ruihhlo ngaite chhanchhuah a, nunphung pangngai an zawh leh theihnan he thuthlung hi kalpui a nih thu an tarlang a. Supply Reduction Service (SRS) ten April ni 11, 2015 atanga August ni 4, 2016 chhunga ruihhlo hrang hrang an man tawh hlut zawng chu Rs. 10,28,08,250 a ni.
