Vawiin chawhma dar 11 khan DK Traffic Point, Champhai vengthlangah Mizoram Sawrkar leh YMA tangkawp in a an buatsaih, Ruihhlo Do Beihpui Thlak hawnna Programme chu Champhai Sub-Hqrs YMA kaihhruaina in District Bawrhsap PU Vanlalngaihsaka, IAS ho a hman a ni.

Ruihhlo Do Beihpui Thlak hawngtu, Champhai District Bawrhsap Pu Vanlalngaihsaka, IAS chuan thu sawiin, ruihhlo hi mitin hmela a nih avangin ruihhlo do kawngah tumah ralbang thei kan awm lo a ni, a ti a.

Addl. DC Pu C. Lalzarliana pawhin 'Kan Ram Dam nan Ruihhlo i do ang u' ti a mipuite sawmin, " Mizote hi ruihhlo chhiatpui nasa berte zinga mi kan nih avangin mutmawh hnarmawh a kan zavaia kan do tlan a ngai ta a ni," a ti a. Champhai district chu ruihhlo sumdawnna hmunpui, Golden Triangle atanga ruihhlo tawlh chhuahna kawngpuiin a paltlang avangin , ruihhlo do kawnga tan nasat a ngaih zual thu leh, "Crime rate ti sangtu pawh ND&PS case a ni a, Champhai District hi a hluarna ber hmun a nih bawk avangin thahnemngai tak a YMA in ruihhlo do a ram leh hnam humhalh hna a thawk hi a fak tlak a, khua leh tui zawng zawng ten ruihhlo do kawng a sawrkar leh YMA kut ti chak turin theihtawp i chhuah leh zual ang u," tiin mipui te a sawm bawk.

Champhai Sub-Hqrs YMA President Pu C. Lalbiakzauva chuan sawrkar leh YMA ten ruihhlo do kawnga tan ho na tur tha tak an duangchhuak chu lawmawm a tih thu leh he thawhho na hian tan rual hlawk zia a tih lan ngei a beisei thu a sawi a. Ruihhlo zuartute chungchangah Pu C Lalbiakzauva chuan,"Mi thisena inchhek muk tumtute avangin khawlai nun a ralti a, chhungkuaah buaina a chhuak a. Mipuiin ralmuang taka khawsak theihna right kan neih pawh chhuhsak kan ni! Zu leh damdawi thalo zuartu te vanga mipuiin harsatna kan tawh zozai hi chhut chian ngam pawh a ni ta lo," tih sawiin ,"Ruihhlo zuartute an phu tawk hremna pek hi Human Right bawhchhiatna a nih chuan, mi nun tichhiaa an Right an bawhchhiat sak hi a let sawm ai pawhin a man a sang zawk ang," tiin ruihhlo zuarte endawng ngam turin Zoram mipuite a sawm bawk.

Vawiin a Ruihhlo Do Beihpui Thlak Hawnna Programme hi Pu F Lalrinmuana'n a kaihruai a. Champhai khawpui chhunga sawrkar hnathawk leh pawl hrang hrang aiawh sawmbikten ruihhlo hi thalaite suattu a nih avangin kan khawtlang alo thianghlim theih nan ruihhlo hi kan do zel dawn ti a au rual in hun an hmang bawk.