September ni 11 hi Mizoram Sawrkar chuan Mizoram State Anti Tobacco Day atan a ruat a, Mizoram hi India rama state hrang hrang zingah vaihlo do na atana Ni (Day) hran nei hmasa ber leh a awmchhun a ni a, hei hian Vaihlo Do hi Mizoram Sawrkar in a ngaih pawimawhzia a ti lang a ni.
State Anti Tobacco Day hmasa ber chu ni 11.9.2014 khian Vanapa Hall, Aizawl ah urhsun taka hman tum a ni a. District tinah Deputy Commissioner te huaihawtin leh Department hrang hrang ah he ni hi hman tum a ni bawk.
Mizoram State Anti Tobacco Day (11th September) ah hian Vaihlo avanga kan hmingchhiatna zawng zawng thaibo a nih theih nan Mizo mipuite thinlung taka vaihlo do theuh turin MSTCS leh ISTH(M) chuan mipui a sawm. Vaihlo hmang mek te pawh he ni hi simna ni atana lo hmang/thlang theuh turin MSTCS leh ISTH(M) chuan a ngen bawk. Vaihlo simna kawnga tan la mek te pawh he ni hi intiamtharna atana lo hmang turin a chah. Vaihlo la hmang lo Mizo thalai leh naupangte he ni ah hian vaihlo hmang lo tura intiam theuh turin MSTCS leh ISTH(M) chuan a ngen takzet bawk a ni.
