Mizoram State Bharat Scouts & Guides in vawiin khan Chief Minister Banquet Hallah State Coucil Meeting President Pu Lal Thanhawla, Chief Minister hoin an nei.

Pu Lal Thanhawla chuan Presidential address a neihah Mizoram Bharat Scouts & Guides (MBS&G) in kan state chhung bakah rampum huap leh khawvel huapa camping, courses leh vantlang tana hnatlannna engemawzah an nei chu lawmawm a tihthu a sawi a. MBS&G chu khawtlang nun siam thatna kawngahte leh thalai ten mahni inthunun theihna an neih theihna tura hmalatu pawimawh tak a ni a ti a. Sorkar nen pawha thawhhona tha tak an nei chu thil lawmawm tak a ni a ti a. Report ngaihthlak atang pawhin kan thlen chin atang zelin hmasawn tur kan nihzia a lang chiang hle a ni a ti.

Chief Minister chuan NCC hotu lian ten Mizoramah NCC Academy dah an duh thu leh Mizoram chu hmarchhak biala NCC Air Wing hmunpui bera siam an tum thu sawilangin, MBS&G nen pawh thawhho a pawimawh dawn a ni a ti a. Hei hian kan thalai tam takte hi khua leh tui thaah a siam thei a ni a ti. Pu Lal Thanhawla chuan MBS&G tan tangkai zawkna a nei anih chuan, a theih chinah zel englai pawha a inhuam thu a sawi bawk a ni.

Meeting-ah hian kum 2014 - 2015 chhunga thil tih an neih hrang hrangte report a ni a. MBS&G dinhmun hrechiang tur leh zirchiang tura din, Study Committee pawhin report an pe bawk a ni. Heng bakah hian kum 2015-2016 chhunga tih tur hrang hrang an duan, Mizoram chhungah 16, hmarchhak bialah15, rampum huap 26 leh khawvel huap tur 3 te chu meeting hian a pawm bawk a ni.

MBS&G dintu Pu J.Buana (L) thalak, State Training Centre, Tanhrila dah tur President Pu Lal Thanhawla hnenah hlan a ni bawk a. Mizorama Bharat Scouts & Guides a State Chief Commissioner (SCC) tur hian Sports & Youth Services department Director ni lai chu dah thin anih angin, tuna SCC ni mek Pu Lalzirmawia Chhangte chu Sports Director anih tawh loh avangin banna thehlutin, a aiah tuna Sports Director ni mek Pu Zothanmawia chu SCC ni turin meeting hian lungrual takin a thlang a ni.

Meeting hi SCC Pu Lalzirmawia Chhangte in a kaihruai a. Chief Minister nupui Pi Lal Riliani bakah Vice President pali zinga pahnih, Pu H.Rohluna, Minister leh Pu Zodintluanga, Minister te pawh meetingah hian an tel a, State Council member Pu Joseph Lalhimpuia, Parliamentary Secretary pawh a tel bawk a ni.