Vawiin khan Tourism Minister Pu John Rotluangliana chuan Lawngtlai Circuit Hall ah Lai Autonomous District Council Executive Members te  meeting a neih puia, Lawngtlai District chhunga Tourist Lodge te enkawlna lamah District Council ten thuneihna tam zawk an neih theih dan tur leh tangkai zawka hman dan tur a sawi pui.

Minister Pu John Rotluangliana chuan Tourist Lodge, District Capital a mi nilo, Autonomous District Council huam chhunga awmte tangkai zawka hman a nih theih nan leh Autonomous District Council ten thuneihna tam zawk an neih theih dan tur ngaihtuah mek a nih thu a sawi a, chutih rual chuan Tourist Lodge te hi VIP leh sawrkar hnathawkte tana sak bik nilovin mipuite tana sak a ni a, hei vang hian mimal leh chhungkaw pawipang thila zin thin ten Tourist Lodge ah thlen in tih hmuh zel ang u. A thlen man pawh zangkhai tak tura duan an ni, a ti.

Parliamentary Secretary Pu TT Zothansanga pawhin thusawiin Mizoramah khualzin an pung zela, hma lam kan pan zel dawn niin a lang. Multimodal kawng te a tlanga khawchhak lam ramte nena kan inthlunzawm tak tak hunah phei chuan khualzin hi kan ngah thin hle tura beisei a ni. Chutihrualin kan rama khualzin te hiptu thil tam tak hi chhim lamah a lo awm hlawm bawk a, hei vang hian ram chhung leh ram pawn atangin khualzin an tam tial tial dawn a. Lodge tha leh changtlung neih belh zel pawh kan mamawh dawn a ni a ti.

Food, Civil Supplies and Consumer Affairs Department leh Transport Department Minister ni bawk Pu John Rotluangliana hian tukin zing khan Lawngtlai-a DCSO Building thar sakna tur hmun hma te, District Transport Office building thar sakna tur hmun leh Legal Metrology Building sakna tur hmun te a tlawh bawka, hma lak dan tur hrang hrangte District Officer te nen an sawi ho bawk.

Minister hi Parliamentary Secretary Pu TT Zothansanga bakah Pu K. Lianzuala, MKVI Board Chairman te, Pu Vabeiha Hlychho, Director Tourism Department te, Pu R. Remmawia, Joint Director, Transport Department te, Dr Andrew H. Vanlaldika, Joint Director (Adm) FCS&CA te bakah Pu Saitluanga, Dy. Director Tourism ten an  tawiawm a ni.

Minister hian vawiin vek hian Saiha a pan nghal a, Saiha a pan pah hian Kawlchaw West khua a Roadside Restaurant sak mek leh Kawlchaw East a Supply Kudam te chu a tlawh nghal bawk.