No.2101/2021-2022

Aizawl, the 3rd September, 2021: Nimin (2.9.2021) khan Mizoram State Boundary Committee chu an Chairman Pu Tawnluia, Dy. Chief Minister hovin Directorate of Forensic Science Laboratory Conference Hall-ah thutkhawm vawi 2-na an nei a. Meeting-ah hian Home Minister Pu Lalchamliana, FCS&CA Minister Pu K.Lalrinliana leh L&J Minister Pu T.J.Lalnuntluanga bakah Boundary Committee Member dangte an tel a; ramri chungchanga mithiam sawm bikte an tel bawk. 

Boundary Committee Chairman Dy. Chief Minister Pu Tawnluia chuan Member leh Special Invitee-te lawmna thu sawiin thurel tan hmain Rev. Dr. R. Lalthanmawia, Vice-Chairman, MKHC-in hunserh a hmang a. Chairman sawmna angin Pu John Neihlaia, IGP (HQ), Mizoram chuan ramria Police awmte dinhmun report a pek hnuah Member-te sawiho tur Discussion Paper chungchang Mizoram Chief Secretary Pu Lalnunmawia Chuaungo-in sawizauna a nei zui a ni.

Boundary Committee Chairman Dy. Chief Minister Pu Tawnluia chuan Mizoram-Assam boundary siamfelna atan a dinna ngai ‘Inner Line of 1875’ ah a la ding reng a, sawihona hre reng chungin Sub-Group chuan enchiang lehin Committee hmaah rawn chhawp leh hunah sawiho leh nise tiin a khaikhawm a. Mizoram-Assam ramria police-te pawh rinawm leh inpe takin an duty reng a, Mizoram mipuite tan a thlamuanthlak hle a ni a ti.

Meeting-ah hian Boundary Committee thutkhawm hmasa ber July ni 30, 2021-a hmachhawpte uluk taka thlirho leh a ni a. Boundary Committee hnuaia Chief Secretary kaihhruai Sub-Group chu vawi 4 a thu tawh a. Sub-Group chuan 2018-a Joint Action Committee-in India Prime Minister hnena Memorandum a thehluh chu uluk leh chik lehzualin a zir chiang a, chumi atanga rawtna leh ngaihtuahho tur agenda hrang hrang a chhawpchhuahte chu chipchiar takin sawiho a ni. 

Boundary Committee Chairman Dy. Chief Minister Pu Tawnluia chuan Sub Group-in Discussion Paper a siam chu All Political Party leh NGO zawng zawngten zirchiang leh a, Committee thutkhawm lehah anmahni pawl theuh ngaihdan meeting-ah pharh turin a ngen a. Nimina pawl aiawhte leh mimal atanga rawtna hrang hrang awmte chu Sub-Group ten zirchiang a, Committee thutkhawm leh hunah Discussion Paper anga buatsaih turin a chah bawk.


Attachment

  • Loading attachment...