3508/2023-2024

Aizawl, the 25th January, 2024: Vawiin khan Mizoram State Boundary Committee chu an Chairman Pu K. Sapdanga, Home Minister hovin Directorate of Forensic Science Laboratory Conference Hall-ah a vawi 6-na atan an thukhawm a. Meeting-ah hian EF&CC Minister, Boundary Committee Vice-Chairman ni bawk Pu Lalthansanga, Chief Secretary Dr Renu Sharma, DGP Pu Anil Shukla bakah Boundary Committee Member zingah MNF, ZPM, MPCC, AAP, BJP, MZP, MSU, CYMA, MUP, MKHC, JAC on ILRFD aiawhte an tel a, ramri chungchanga mithiam sawm bikte leh Home Department official pawimawhte an tel a ni.

Boundary Committee Chairman Pu K. Sapdanga chuan Member leh sawm bikte lawmna thu sawiin meeting koh a nih chhan leh thil pawimawh dangte sawifiah a, hemi hnu hian Pu H. Lalengmawia, Commissioner & Secretary, Home Department, Boundary Committee Member Secretary ni bawk chuan report a pe a ni.

Vawiin meeting hian sawrkar hmasa hun tawp lama Mizoram sawrkar leh Assam sawrkar indawrna kal tluang lai, Mizoram inthlanpui neih dawn vanga chawlh lailawk chu tharthawh tura hmalak tha a ti a, hei bakah hian ramri chungchanga ngaihdan hrang hrang awmte sawiho niin hun remchang hmasa berah thutkhawm leh nise an ti a ni.

Home Minister, meeting kaihruaitu ni bawk chuan ramri him tak, mipuite thlamuang taka an khawsak theihna tur nawr chhuah chu an thupui ber a nih thu sawiin, thenawm state te nen kan lungrual tlanna tur kan zawn a pawimawh a ni a ti a. Sawrkar hmasa hmalakna te chu zahawm a tih thu sawiin an ngai pawimawh hle bawk tih a sawi a ni.

Vawiina meetingah hian pawl leh party hrang hrang aiawhte chuan ramri buaina chinfel a nih a, inremna neih thuai an duh tawh thu an sawi hlawm a ni.

Boundary Committe thutkhawm hmasa ber hi July ni 30, 2021 khan neih a ni a, thutkhawm vawi 2-na hi September ni 7, 2021 khan neih niin a vawi 3-na chu November ni 17, 2021 khan neih a ni a, a vawi 4-na September ni 9, 2022 ah neih niin, a vawi 5-na hi January ni 20, 2023 khan neih a ni. Tun tum hi Mizoram sawrkar thar a pian hnu a thutkhawm vawi 1-na a ni thung.