3507/2023-2024

2024 Pawlkut thla ni 25: Vawiin khan National Voters' Day (NVD) vawi 14-na chu "Nothing Like Voting, I Vote For Sure" (Vote thlak tluk a awm lo, vote ka thlak ngei dawn) tih thupui hmangin I&PR Conference Hall, Kolasib-ah District Election Officer, Kolasib Bawrhsap Pu John LT Sanga hovin hman a ni.

Kolasib DEO Pu John LT Sanga chuan India ram chu khawvela mipui rorelna (democracy) ram lian ber niin, khawvela mihring tamna ber a nih angin a mi chengte pawh nunphung, ziarang, duh zawng leh ngaih dan inang lo tak tak kan ni a, chuti chung chuan democracy-in nghet takin min phuar khawm a ni, a ti a. Democracy ram nih hlutna leh zalen taka vote thlak theih hlutna hre chunga inthlan leh a kaihhnawihah taima taka tel zel a pawimawh tiin, kal khawmte chu democracy nihphung chawi nungtu nih zel tum turin a chah a. Vote neih leh vote thlak chu khua leh tuite tih makmawh a nih thu sawiin, vote thlak ngawr ngawr piah lamah ram veina rilru nen dik leh thianghlim taka vote thlak thin a pawimawh a ni, a ti.

He hun hi SVEEP Nodal Officer, Kolasib District Information & Public Relations Officer Pu C. Lalhruaitluanga'n a kaihruai a. Assistant Electoral Registration Officer (AERO), Kolasib Sub-Deputy Commissioner Pu Gilbert Lalhlimpuia'n electoral roll-a inziah luh dan leh inthlan chungchanga hriat tur pawimawh hrang hrang a sawi a. Khuallian Pu John LT Sanga kaihhruaiin NVD thu tiam sawi rual a ni a. Essay inziahsiak leh Booth Level Officer (BLO) thawk thate lawmman sem niin, Khuallian leh Deputy DEO Pi Melody Ngurthantluangi te'n a dawngtute hnenah an hlan a. SVEEP kal tlanga hma lakna hrang hrang hlimthla (video) leh Chief Election Commissioner of India Pu Rajiv Kumar-a thuchah video te thlir ho a ni a. Zaithiam zai ngaihthlak niin, inthlan leh a kaihhnawih chungchangah on the spot quiz buatsaih a ni bawk a. Election Officer Pi Christina Lalmuanzuali'n lawm thu sawiin hun a khar a ni.

NVD 2024 puala essay writing competition-a lawmman dawngtute chu:
A. High School level:
1st prize - Jenny Lalhruaitluangi,
Class-X, Govt Chawnghmingliani Memorial HS
2nd prize - Dominic Zomuansanga,
Class-IX, Govt Diakkawn HS
3rd prize - Pauline Lalhriatpuii,
Class-IX, Govt Kolasib HS

B. Higher Secondary School level:
1st prize - Miriam Ramtharmawii,
Class-XI, St John's HSS
2nd prize - Hatpineng Chongloi,
Class-XI, C. Zakhuma HSS
3rd prize - Ofira Hatparmoi,
Class-XII, C. Zakhuma HSS

1-na hian Rs. 2,000/- leh citation, 2-nain Rs.1,500/- leh citation leh 3-nain Rs. 1,000/- leh citation dawngin, mi 3 hnenah consolation prize Rs. 500/- theuh hlan a ni bawk.

Best BLO chawimawina, Rs. 3,000/- leh citation chu heti ang hian hlan a ni bawk

4-Tuirial - Pu Jimmy Lalramchhana, Thingdawl-III
5-Kolasib - Pu K. Lalrinchhana, Bairabi-II
6-Serlui - Pu Pc. Lalengsanga, N. Thinglian
Vawiina Kolasib-a NVD hmannaah hian official leh district election staff-te, BLO-te, chanchinbu mite, lawmman dawngtute leh Govt Kolasib High School, Govt Diakkawn HS leh Govt Chawnghmingliani Memorial HS zirlaite an kal khawm a ni.