Vawiin khan Health Minister Pu Lalrinliana Sailo chuan Mizoram State Cancer Institute, Zemabawka khawl pawimawh tak tak dah tharte a hawng.
Pu Lalrinliana Sailo chuan Mizoram State Cancer Institute in Cancer damlote enkawlna atana khawl tangkai tak takte an nei ta chu lawmawm a tih thu sawiin, "Phai lama cancer damlo refer ngai tam takte chu kan ramchhungah ngei kan enkawl thei tawh dawn a ni," a ti a, "hei hian chhungkaw tam tak te pawisa senso nasa takin a phuhruk dawn a ni," a ti bawk. Mipuite hriselna chu sorkar ngaih pawimawh ber te zinga mi anih thu sawiin, uluk taka zirchian hnuah khawl tha berte chauh lei thin a ni a; a man zat aia mipuite tana a thatna leh tangkainate ngai pawimawh hmasaa, khawl tlo leh tha ber tur lei thin chu chawi nung zel tura chahin, MSCI chuan hma a sawn zel theih nan duhsakna a hlan bawk.
He hun hi Dr. K. Lalbiakzuala, Director, Mizoram State Cancer Institute chuan kaihruaiin, technical report Dr. Jeremy L.Pautu hnen atangin ngaihthlak a ni a, Dr. Lalrinliana Sailo, DHME; Dr. K. Ropari, DHS leh khawl tharte bunsaktu, Pu Chowdhury, Sales Manager, Phillips te'n thu an sawi bawk.
Mizoram State Cancer Institute (MSCI), Zemabawk hi 23rd August, 2011 khan hawn tan niin, tunah hian cancer damlote enkawlna chi hrang hrang - Radiation Therapy, Chemo Therapy, Medical Oncology, Palliative Care, Oncopathology Laboratory, Radio Diagnosis leh Blood Storage te tih theih a ni. MSCI hian sorkar laipui hnuaia Tertiary Cancer Centre Scheme atangin cheng vaibelchhe ruk (6) a hmu a. Diltu cancer centre 29-a centre 5 chauh pek zingah telin, heng khawl thar mamawh tak tak te hi lei a ni ta a ni:
1. Big Bore C.T.Scan with Simulator (Phillips, Holland) : Cancer hem tura hem ngai laitak chauh hem theihna tura thlalakna khawl a ni a, CT Scan hmanna dang atan a hman theih vek bawk. Rs. 3,86,50,340/- man niin, India hmarchhakah a nei hmasa ber kan ni.
2. Fully Automated Blood Cell Separator (Fresenius Kabi, Germany) : He khawl hian cancer damloten an mamawh ang thisen component chauh thisen petu (blood donor) atanga lachhuakin, a dang mamawh loh zawng kha a petu thisenah a pe kir leh vek thei a ni. Rs. 52,77,510/- senga lei niin, India hmarchhakah a nei awmchhun kan ni.
3. Tissue Processor with Vacuum Function (Leica Microsystem, Germany) : Cancer nih leh nih loh enfiah dawnin, taksa atanga tisa them lakchhuah te damdawi hrang hrang hmanga sawngbawl hmasa tu khawl a ni a, Rs. 23,16,882/- senga lei a ni.
4. Fully Motorized Microtome (Leica Microsystem, Germany) : Tissue Processor-in tisa them a sawngbawl zawh tawhte chu he khawl hian enlennaa en theih turin pan te tein a lo hlaia, Rs. 21,05,250/- senga lei a ni.
