Vawiin khan Labour & Employment Minister Pu Lalrinliana Sailo chuan Mission Foundation Movement Hall, Bawngkawn-ah Cement Mistiri Training zote hnena Certificate semna inkhawm a hmanpui.

Pu Lalrinliana Sailo chuan Mission Foundation Movement-in Mizo thalaite tana eizawnna tlak leh ram pawna pawisa luangral tur venna kawng pakhat atana cement mistiri training an buatsaih chu lawmawm a tih thu a sawi a. Ram changkanga an tih thin angin, darkar bi-a inhlawh chu thalaite'n hunawl an hman that nan leh an intodelhnan a pawimawh a ni, a ti. Thiam thil leh kut hnathawhah Mizote chu hnamdangte aia kan san zawk thu sawiin, teirei peihna leh dawhtheihna te chu kan zir tur pawimawh tak a nih thu a sawia, "Hmasawnna eng pawh lo kal se, kan lo dawl zo tur a ni," a ti. Minister hian training chhuakte hnenah certificate hlanna hun a hmang nghal bawk.

He hun hi Upa Dr. Rokamlova, Sr. Vice Chairman, MFM chuan kaihhruaiin, Upa R. Vanlalzauva, MFM Director hnen atangin report ngaihthlak a ni a, Khualzahawm  Upa H.Lalhmingmawia, Coordinator, Synod Social Front chuan thu a sawi bawk.

Mission Foundation Movement hnuaia Cement Mistiri Training (Certificate Course) senso hi Synod Social Front tumsak niin, a tumkhat nan Aizawl khawpui chhung  hmun panga-ah kumin April leh June inkar chhung khan neih a ni a, mi 61-in an zirchhuak a ni. MFM chuan he course hi buatsaih chhoh zel an tum thu sawiin, training buatsaih leh tur atan Pu Lalrinliana Sailo chuan Labour & Employment Department kaltlangin cheng nuai khat a pe a ni