Vawiin khan Mizoram State Commission for Women (MSC for W) Chairperson Pi Lalnipuii hovin a office-ah hmeichhe tlawmngaipawl hrang hrang hruaitute, kohhran hrang hrang hmeichhe hruaitute leh Women Commission Member-te chu hmeichhiate dinhmun leh MLA inthlan lo awm tur chungchang an sawi ho. 

Pi Lalnipuii chuan Women Commission hi hmeichhiate thlavang hauh tur liau liau a Sorkar din a ni a, hmeichhe NGO te nen a tul anga thawkho tur leh Sorkar pawhin hmeichhe chungchangah bik chuan a rawn thin tur an ni tih Women Commission Act ah tarlan a nih thu a sawi a.

Hmeichhiate tana kawng hrang hrang a hma a lakna chu midang nek chep tumna a ni lova, hmeichhiate hian mipa te an finna leh theihna zawng zawng a an tanpui ve a, inchhungah te, khawtlangah te leh ram tan thlenga an tangkai zawk dan a ngaihtuah a ni, a ti.

Mizoram chu India ramah hmeichhe MP la nei lo chhun leh hmeichhe MLA kum 30 dawn an awm ta lo chu a vei thu sawiin Pi Lalnipuii chuan hmeichhiate inngaihtuah harh a tul hle, a ti.

Meeting-ah hian tlawmngai pawl leh kohhran hmeichhia aiawh mi 15 an tel a ni.