4809/2025-2026

Aizawl the 12th March, 2026 : International Women’s Day denchhenin National Commission for Women, New Delhi leh State Commission for Women chuan India ram pumah “Maha Jan Sunwai” (Free Legal Public Hearing) a buatsaih a ni.

International Women’s Day hi Mizoram pumpui District zawng zawngah dt. 9th March – 13th March, 2026 chhung hian hlawhtling tak hman a ni. He hun hi Mizoram State Commission for Women mai bakah District tina Deputy Commissioner, Superintendent of Police, District Legal Services Authority leh Women & Child Development te atangin an hmanpui a ni.

Hmeichhia dikna chanvo rahbehna hrang hrang tuar te chuan he hunah hian complaint an thehlut a. In chhungkhura hleilenna eng kawng pawha tawk te, nupa kar harsatna avanga hmeichhe chunga tawrhna thleng te, hnathawhna hmuna thawhpui mipa te atanga harsatna tawk te, chhaih nawmnah tawk te leh eng kawng pawha hmeichhia nihna avanga hleilenna leh nekchepna tawk tan harsatna a thlen theih ang.

“Mahila Jan Sunwai” (Free Legal Public Hearing) hi a tawp ber leh a hmawr bawkna atan vawiin 12th March, 2026 hian Aizawl-ah Mizoram State Commission for Women chuan a buatsaih a. Superintendent of Police, Aizawl District; Deputy Commissioner, Aizawl District; Mizoram State Legal Services Authority; District Legal Services Authority leh Women & Child Development te atangin an rawn hmanpui a. Case hi 14 (Sawmpali) dawn a ni a, hengte hi ngaihtuah nghal a ni a, an harsatna a zirin chinfel nghal a ni a, chinfel mai theih loh te chu legal aid pek an ni.

Mizoram State Commission for Women chuan International Women’s Day, 2026 denchhena “Mahila Jan Sunwai” (Free Legal Public Hearing) Mizoram pumpui-a hlawhtling taka a buatsaih thei hi lawmawm a ti hle a ni. He hun denchhena Mizoram puma case lut hi 60 (Sawmruk) a ni a, a tam zawk hi chinfel sak theih an ni a, case dang zawng a hmuna chinfel theih loh te hi District Legal Services Authority, Police, One Stop Centre, Protection Officer (Domestic Violence), Court, Child Welfare Committee-ah te refer an ni.

Mizoram State Commission for Women chuan Mizoram hmun kilkhawra hmeichhe harsatna neite, hmunpui rawn pan thei si lo te tana International Women’s Day denchhena Free Legal Public Hearing neih hi tha a tiin, hun reilote chhunga hmeichhia tam tak ten an lo chhawr tangkai hi lawmawm a ti takzet a ni.