4808/2025-2026

Dated Hnahthial, 12th March, 2026: Jal Mahotsav kalpui mek-ah vawiin khan Pangzawl Community Hall-ah PHED Hnahthial WATSAN Division hmalakna in Jal Arpan Diwas hman niin Pangzawl tui lakna chu PHED Hnahthial WATSAN Division chuan Pangzawl khawtlang hnenah an hlan a, he hun hi District Bawrhsap leh Chairman, Hnahthial District Water and Sanitation Mission ni bawk, Pi K. Vanlalruati chuan khuallian niin a hmanpui a ni.

Khuallian chuan Jal Jeevan Mission (JJM) hnuaia hmalakna in India ram pumpuia thingtlang khua in tinah tui connection Functional Household Tap Connection (FHTC) pe vek turin a ruahman a siam thu sawiin chutiang tur chuan theihtawp chhuaha hmalak a nih thu a sawi a. Hnahthial District khaw sawmhnih pasarih (27)-ah te FHTC 5,341 pek a nih tawh thu a sawi bawk. Hun hmanna khua Pangzawl hi nakin hun zela hmasawn thei tura beiseina khua a nih avangin he program-ah hian telh hmasak a nih thu a sawi a. Tui connection FHTC hi Pangzawl-ah za ruk (600) a awm mek tih a tarlang bawk.

Inkhawm hi Pu R. Lalrinawma, VCP Pangzawl South in a kaihruai a, Hnahthial WATSAN Division enkawltu Senior Executive Engineer, Er. Lalhruaitluanga'n tui pawimawhna, humhalh a tul thu leh renchem a tul zia kalkhawmte a zirtir a, Pangzawl Village Council President te hnenah tui lak hlanna hun a hmang a, FTK inhrilhfiahna hun hman a nih hnuah Hnahthial WATSAN Sub Divisional Officer, Er. Lalhmangaihzuala’n lawmthu sawiin hun a khar a, hemi hnu hian kawng zawh leh khawlaia bawlhhlawh chhar faina hun hman a ni bawk.