Mizoram Consumer Protection Council chu vawiin chhun khan I&PR Auditorium-ah a Chairman Pu H.Rohluna, FCS&CA Minister kaihhruainain an thukhawm.

Council thurel kaihruaiin Minister chuan thuhmahruai a sawi a. Khawvel ram changkang leh India ram ngei pawhin consumer-te hmakhua humhalh chu an ngaih pawimawh dan te, Mizoramah pawh consumer-te chanvo humhalh hlutzia kan hriat sawt dan te a tarlang. Council Meeting hnuhnung ber 2006 lam daiha neih chhunzawmna hmasa ber a nih thu sawiin Minister chuan Mizoramah Consumer Awareness chu district leh village level thlenga tuai thara tihnun leh zual a tul thu a sawi. Tute pawh hi milian anni emaw mite anni emaw consumer vek kan nih avangin chanvo dik tak kan neihna turah hian midangte thawh tur bikah dah lovin keimahni hmakhua vek a ni tiin Council member-te chu thahnemngai taka an ngaihtuahna te hmanga thurel turin a sawm a ni. FCS&CA Minister chuan Mizoram sorkar sum indaihlohna avangin consumers’ affairs lam chu duh anga kalpui a harsat dan sawiin sum neih ang chin tawkah erawh chuan daihzai leh tangkai thei ang bera hman tum a ni ang, a ti. Council Member-Secretary Pu K.Riachho, IAS, FCS&CA Secretary ni bawk chuan kalkhawmte lawmna thu a sawi a. Consumer-te chanvo dik tak humhalh tur hian rampumah Consumer Protection Act 1956 hman mek a nih thu leh Mizoram pawhin hemi hnuaiah hian Consumers Protection Rules 2000 a neih mek thu a sawi a. Pawl hrang hrang, sorkar official leh MLA lo telte chungah lawmthu a sawi a ni. Vawiin Council meeting-ah hian Consumer Protection Council kut tihchakna tura rawtna hrang hrang ngaihtuah a ni a, chung zingah chuan sum tam tawk bithliah te, Consumer Affairs Department emaw Wing hran emawa dah rawtna te, District Forum hrang hrang tih phuisui dan te bakah thil man hrang hrang man sang lutuk tur bithliah kawnga consumers organisation-te rawn thin nise tih leh Gas rualkhai zawka semna tura rawtna hrang hrang te a tel a ni. Vawiin meeting-ah hian Council member MLA pahnih Pu R.Lalrinawma leh P.P.Thawlla bakah Law Secretary leh Aizawl D.C. te pawh an tel.