Vawiin khan Synod Conference Centre, Aizawl-ah Mizoram State Cooperative Union (MSCU) chuan General Assembly vawi 32-na an hmang a. Pu Lalrinsanga, Addl. Registrar, Cooperative Societies, Mizoram chu khuallian a ni.

Khuallian Pu Lalrinsanga chuan sakhuana tihloh ah chuan cooperative movement hi khawvela movement upa ber a ni a, Mizorama pawh kum 1949 ah Cooperative society kan hmelhriat tan a, kum 70 hnu ah hian hmasawnna tur tam tak kan la nei a ni a ti a, khawvel ram hrang hrang leh India ram hmun hrang hrangah Cooperative Movement a chak tha in Cooperative Societies te pawh an hausa hlawm em em mai a, Mizoramah pawh hetiang hi kan tlin ve thei a ni a ti a, Cooperative society te tihchak lehzual na tura tan lak a pawimawhn thu a sawi.

Mizoram State Cooperative Union (MSCU) hi March Ni 29, 1975 khan din niin Assam State hnuaia Aizawl District Assistant Registrar of Cooperative Societies (ARCS) enkawlna hnuaiah din a ni. Tun dinhmunah hian MSCU-ah thawk nghet 23 awmin muster roll 3 leh contract basis a thawk 3 an awm. MSCU hnathawh kaihruai turin Cooperation Department atang Assistant Registrar of Cooperative Societies (ARCS) chuan Chief Executive Officer, MSCU hna a chelh a ni. Mizoram State Cooperative Union hnathawh dan kalphung duanga kaihruai turin Board of Directors an awm a, hemi hnuaiah hian committee peng pahnih Executive Committee leh Staff Selection Committee an awm a ni. MSCU hi cooperative society hnena zirtirna petu a nih angin kum 2018-2019 chhung khan training hrang hrang a buatsaih a, chungte chu: Cooperative Awareness Programme, Refresh Course Training, Leadership Development Programme, Youth Education Programme, Village Level Education Programme an ni. Cooperative Society te hnen bakah hian NGO hrang hrang te, kohhran thalaite leh zirlaite hnenah Cooperative Society pawimawhna leh tangkaina zirtir thin a ni bawk. Tunah hian Bara Bazar, Aizawlah MSCU Office building sak mek a ni a, kumin kumtawp lam hian sak zawh fel hman beisei a ni.

Programme hi hun hniha then a ni a, chawhma hun hi MSCU President Pu K. Lalchamreia’n kaihruaiin kalkhawmte lawmna thu a sawi a. Nikum MSCU General Assembly leh kumin General Assembly inkara an hruaitu boral mi pahnih –Pu Lalthlengliana, Vice-President, MSCU leh Pu R.L.Thanzauva, BoD (Elected), MSCU sunna hun hman a ni a. MSCU Chief Executive Officer Pi Lalnuntluangi Hrahsel hnen atangin annual report ngaihthlak a ni a. Pu Rosangzuala. BoD (Elected)-in lawmthu sawina in hun a khar a ni.

Chawhnu lamah rorel inkhawm neih niin kum 2018-2019 Annual report thlirho niin pawm a ni a, kum 2017-2018 Annual Audit Report pawh sawiho a pawm a ni bawk.