3640/2022-2023
Aizawl, 20.02.2023: Mizoram State Day 36-na chu vawiin khan Vanapa Hall-ah lawmna hun buatsaih a ni a. Chief Minister Pu Zoramthanga chu khuallian a ni.

Chief Minister Pu Zoramthanga chuan Mizoramin kum 36 lai State nihna a chang ta chu lawmawm a tih thu sawiin, he niah hian Mizoram chu midangte tan malsawmna ni tura inbuatsaih a tul thu a sawi. Chief Minister chuan hmanlai pi leh pute hunlai atanga Mizoram an lo thlangtlak dan leh, tuna Mizoram a lo indinchhoh dan sawiin, rambuai harsatna tinreng paltlangin vawiinah remna leh muanna duhawm tak hnuaia hun kan hmang thei hi Siamtu’n chhan neia a rel vek a nih thu a sawi a. Midang tan malsawmna ni thei tura min buatsaihna a ni tiin, chu malsawmna haichhuah chu tu dang kutah nilovin keimahni kutah theuh a awm a ni, a ti. Pu Zoramthanga chuan Zoram malsawmna haichhuah tur tam tak - a chhunga cheng mipuite a let engemawzata chawm zo ram hman tangkai theih zau tak te, sik leh sa nuam tak, ruahtui tha tak takte, hmalakna ti awlsamtu atan a tlangpuiin tawngkhat hmang, rinna thuhmun nei leh zirna lamah pawh literacy tha tak kan ni zel te hi a nih thu a sawi a. Hmasawnna chu thawklehkhata thleng vek thei ni lo mahse, a rahbi thiam taka kan zawn a kan kalpui a tul a, chu chu mithiamte tan chona nise a tih thu a sawi a. State Day lawmnaa kalkhawm sawrkar hotute chu Mizoram tan theihtawp chhuah turin a sawm a ni.

State Day lawmna inkhawm kaihruaitu Dr. Renu Sharma chuan State Day kum 36-na lawm a nih hian Mizoramah hmasawnna tam tak hmuh theih a nih thu sawiin, chutihrual chuan hmabak tam tak - a bik takin industrial sector leh entrepreneurship tihhmasawn lamah a la awm thu a sawi. State dangte nen khaikhinin hmasawnna kawng zawh tan tlai viau mahse Mizoram chu a thlen chin a thui viau tawh thu Chief Secretary hian a sawi a. Mizoram chu khawtlang nun a bet tlat tlawmngai pawl leh kohhran pawimawhna avangin sawrkar inrelbawlna kawngah thui taka a puih thu leh awlsamna a siam thu a sawi bawk.

NGO CO-ordination Committee Chairman Pu R. Lalngheta pawhin ram hmasawn zelna tur atan mitinin mawhphurhna kan nei tih he State Day ah hian hrehhuak thar leh ila a tih thu sawiin, sawrkar hruaitute leh sawrkar hnathawktute chuan Zoram dah pawimawh hmasa ber a, hlemhletna tello a hna an thawh pawimawh a tih thu a sawi a ni.

State Day lawmna inkhawmah hian Deputy Chief Minister Pu Tawnluia, Speaker Pu Lalrinliana Sailo, Cabinet Minister te leh Minister of State te bakah MLA leh sawrkar hotu pawimawh tak takte an tel a. Inkhawm hi GAD Commissioner & Secretary Pu K. Lalthawmmawia chuan lawmthu sawiin a khar a ni.