3639/2022-2023
Aizawl, 20th February, 2023 : Vawiin khan Law & Judicial Minister Pu T.J. Lalnuntluanga chuan Zomi Cultural Society, Aizawl Joint Committee huaihawt, "Zomi Namni " Vawi 75-na lawmna hun, Bawngkawn Chhimveng Cultural Hall a neih chu khuallian niin a hmanpui.

He huna thusawitu khuallian Pu T.J. Lalnuntluanga chuan Zomi Namni hman a nih dan te ropui a tih thu sawiin, Hnam Inpumkhatna hi a hlu a, inngeih taka awm leh tanrual chuan hnam chak takah min chhuah theih a ni, a ti a. Mizoram sawrkar kan hrawn lai mek hian hnam inpumkhatna a ngaipawimawh em em a. Tun sawrkar a din phat atang khan kan chheh vela kan unaute nena inpawhna tha zawk kan neih theihna turin hma ala nghal a, Transport Department changtu Minister a nihna anga hma alak zingah zohnahthlak te nena inkalpawhna Aizawl leh Jampui (Tripura) Bus service (Hnam inpumkhatna Bus) tlantir a ni, a ti a. Aizawl leh Lamka (Manipur) Bus service pawh hun reilo teah tihfel beisei a ni a ti bawk. Aizawl - Tahan Bus service tura hmalakna erawh Myanmar ram a buai tak avangin External Affairs Ministry lam hmalakna a thuanawp ta rih a ni tih a sawi a ni.

Pu Manuna chuan Champhaiah Zomi Cultural Centre sak a nih theihna turin NEC kaltlangin project siam a ni tih a sawi a, Fund hi hmuh mai theih tur niin, Zomi Cultural Centre hi Champhai ah sak thuai tum a ni a ti a. Zomi Cultural Center sak tum hi Chief Minister Pu Zoramthanga’n priority list-ah a dahsak avangin lawmawm a tih thu a sawi bawk.

Pu T.J. Lalnuntluanga chuan Zomi Namni chhimtu kalkhawmte chu hnam inpawh leh lungrual tak kan nih zel theihna turin tan la tlang zel turte, kan hnam kan in chawikan tawn theihna tura mahni zawn theuha theihtawp chhuah zel tura fuihin, duhsakna a hlan a ni.

Zomi Namni Vawi 75-na lawmna hunah hian Pu Thang Tuan Pau, M.P (Myanmar) chu khualzahawm niin, he hun hi mi pawimawh tak tak ten an hmanpui a. Hnam lam leh zai bakah, malzai thiam tak tak ngaihthlak a ni.