207/2026-2027

Aizawl; 18th April,2026 : Mizoram State Election Commission chuan vawiin April 18, 2026 khan Election Model Code of Conduct bawhchhiaa puhte chungchang a hnuaia mi ang hian thuchhuah a siam.

State Election Commission chuan Model Code of Conduct bawhchhiaa puh Minister pathum (3), MP pakhat (1), MLA pakhat (1) leh ZPM, AMC Corporator candidate te chu Model Code of Conduct an bawhchhiaa puh an nihna lakah thiam an chantir.

Model Code of Conduct bawhchhiaa puh mi paruk (6) te hi Pu PC Vanlalruata, Agriculture Minister, Pu C. Lalsawivunga, LAD Minister, Pu B. Lalchhanzova, FCS&CA Minister, Pu Richard Vanlalhmangaiha, Lok Sabha MP, Pu Lalmuanpuia Punte, Advisor to CM leh Pu K. Lalrodinga, ZPM Corporator candidate te an ni a. SEC chuan heng MCC Bawhchhiaa puh te hi ziak a insawifiah turin a ti a, an insawifiah veka, hei bakah hian complain thehluttu Pu H. Lalmuankima, MPCC Legal Cell Secretary leh Pu Lalbiakkima, MNF Legal Board, Joint Secretary te chu finfiahna (evidence) an neih ang ang thehlut turin a hriattir bawk a ni.

An insawifiahna leh complain thehluttute leh evidence uluk taka zirchian a nih hnuah MPCC Legal Cell Secretary Pu H. Lalmuankima, Minister Pu PC Vanlalruata leh MLA Pu Lalmuanpuia Punte te Official Car hmanga campaign a a puhna chu finfiahna rintlak tawk a awmloh avangin thu tlingah a ngai lovin a hnawl a ni.

Hetih lai vek hian Republic Vengthlang, Aizawl a transformer dah chungchanga Pu C. Lalsawivunga, LAD Minister MCC dan bawhchhiaa puhna chu AMC inthlan puan hmaa thil tih ni a sawifiah a ni a. Minister Pu B. Lalchhanzova, Aizawl East II huam chhung, Chhinga Veng junction siam leh Armed Veng ‘S; Cultural Club te puia puhna te chu AMC inthlan puan hm ani a sawi a ni a, hei bakah hian Lok Sabha MP Pu Richard Vanlalhmangaiha, Republic Vengthlang leh Upper Republic Mahindra Bollero Pickup a pe ni a sawi pawh AMC inthlan puan hm ani a sawifiah a ni. AMC Candidate Pu K. Lalrodinga thiltiha puh pawh engmah tih a neih loh thu a sawifiah bawk.

Heng insawifiahna te hi tifiahtu tur finfiahna tarlan theih vek a nih lain, complain thehluttute hian an thusawi dikzia proof na tur engmah an thehlut thei lova, chuvangin SEC chuan MCC bawhchhiaa puh ten finfiahna document te nena an thehluh theih vek laia complain thehluttuten an thusawi finfiahna documentary proof engmah an neih loh avangin MCC bawhchhia-a puhna te hi thu tlingah a ngai lo a ni.