206/2026-2027 

Lawngtlai, 18th April 2026 : Vawiin khan Lawngtlai bawrhsap Pu Donny Lalruatsanga chuan 'YLA In' Electric Veng Branch a hawng.

Pu Donny Lalruatsanga chuan YLA leh vengchhung mipuiten a tulna ang anga tangkai taka an hman tura lawm taka 'YLA In' a hawn thu a sawi a. YLA hruaituten tha leh zung, ngaithuthna seng a theihtawp an chhuahna bakah Bialtu MLA, leh mitlawmngaite inphalna zarah 'YLA In' tha tak an nei thei chu a lawmpui thu a sawi a. Faina leh thianghlimna kawnga Lawngtlai khawpui chhunga vengte inelna pawimawh tak 'Bawrhsap Awward' ah Pakhat na dinhmun Electric Veng ten an hauh chu thinlung taka a lawmpui thu tarlangin, hmalam hunah pawh theihtawp chhuah zel turin a chah a.Drug Free District - kalpui mek a nih thu sawiin, bawrhsap chuan Ruihhlo do kawngah YLA leh khawtlang mipuite theihtawp chhuahpui turin a sawm a. Ruihhlo laka fihlim leh Ruihhlo awm lohna veng a inchhal ngam ni thei tura Ruihhlo do kawnga tan la thar sauh sauh turin a fuih a ni.

Bawrhsap chuan bialtu MLA in 'Tho law dir tuah (Stand up Lawngtlai)' a hawn thu tarlangin, hemi kawngah hian chak taka hmalak tan mek zel a ni, a ti a. Faina leh thianghlimna, khawpui cheimawi, Traffic Management, leh Ruihhlo do kawngah District Administration leh LADC - te an thawkho mek tih sawiin, hemi kawngah hian sawrkar anga hmalakna tur kawng hrang hrangah VC, YLA leh mipuite thawhpuina a pawimawh dawn hle tiin, thawhpuiah a sawm a. Lawngtlai District hmasawnna tur kawng hrang hrang kelpui mek a nih thu tarlangin, Pu Donny Lalruatsanga chuan kawng engkima sawrkar lo tawiawm zel turin kalkawmte leh veng mipuite a sawm nghal a ni.

Pu F. Lalrothanga, President, CYLA, chuan YLA Electric Veng Branch ten 'YLA In' tha tak an nei chu thinlung taka a lawmpui thu sawiin, tangkai taka hmang turin a chah a. Tlawmngai Pawl an nihna hriaa, vengchhung mipuite tana thahnem ngai taka thawk zel turin a ngen a ni. Pu K. Laldinmawia, VCP, leh Pu Joseph Lalhmingthanga Chinzah, Sr. Vice President, LDFA - te pawhin thu tawi sawina neiin, YLA bakah vengchhung mipuiten an chhawr dawn hle tiin, tangkai tak hman a ni dawn a, a enkawl kawngah pawh YLA te theihtawp chhuah zel turin an chah a ni.

Vawiin hun hmanna hi Pu Lalthangpuia, President, YLA Electric Veng Branch chuan hun a kaihruaiin, Pu Biakhmingthanga Pautu, Secretary YLA Electric Veng Branch chuan report tawi pekna a nei a, chawhlui kilho nghal a ni.