205/2026-2027

Kolasib, 18th April, 2026 : Vawiin khan Kolasib Deputy Commissioner Pu H. Dolianbuaia chuan Kolasib District chhunga National Highway (NH-306 & NH-06) kawngpui hman lai mek dinhmun leh 4-Lane kawngpui siam mek te chu a hmunah tlawhin a enfiah a. He hunah hian NHIDCL hotute chuan DC hi tawiawmin, kawng siam hna an thawh dan kalphung leh hmasawn dan chanchin te uluk takin an lo hrilhfiah.

NHIDCL hotuten report an pek danin, kawngpui hman lai mek (Vairengte leh Sairang inkar) thawmthat hna hi hlawm 5-ah then a ni a. Hlawm thum (3) te chu siam zawh tawh niin, hlawm hnih (2) ah black topping thawh hmabak a la awm a ni. Kawng an siam zawh tawh chin te hi 4-lane laitu EPC Contractor te hnenah hlan tawh a ni.

Kolasib District chhunga 4-lane laih mek pawh hmun hrang hrangah tlawh nghal a ni a. NHIDCL hotute tarlan danin 4-lane kawngpui siam tur hi a vaia belhkhawmin km 90-a thui a ni a; km 30 chu kawng awmsa (existing road) ah siam a ni dawn a, km 60 chu kawng laih thar (bypass) a ni thung ang. Bypass hi hmun 6-ah a awm dawn a ni. Tuna kawngpui hman lai mek hi km 117 a ni a, he 4-lane kawngpui hi siam zawh a nih hunah chuan kawng thui zawng hi km 30 zetin a pawt tawi dawn a ni. Package 7 bik hi hna 20% zawhfel a nih tawh thu an sawi bawk.

He kawngpui thar laih mekah hian lei (bridge) engemawzah dawh a ni dawn a. Lei dawh tur zingah hian a sei na lai ber tur chu Mualkhang ram hnaiah awmin, metre 540 zeta thui tur a ni a, hei hi peihfel a nih hunah chuan Mizorama lei sei ber a ni dawn a ni.

Kolasib DC Pu H. Dolianbuaia chuan kawng siam hnaa hmasawnna hmuh tur a awm chu lawmawm a tih thu a sawi a, hnathawktute chu theihtawp chhuaha thawk chhunzawm zel turin a chah a . Kawng siam hna an thawhnaa harsatna an neih te sutkian a nih theih nan District Administration chuan theih anga hma a lakpui zel tur thu a sawi bawk.

Vawiina DC tawiawm tute ah hian NHIDCL hotute bakah Pi B Malsawmtluangi, ADC Kolasib, Kawnpui SDO, DIPRO leh SDC Kolasib te an tel a ni.