2058/2025-2026

Lawngtlai, 3rd November 2025 : Lai Autonomous District Council (LADC) hnuaia 12th Member of District Council (MDC) inthlanpui 2025 - lo awm tur atan a inbuatsaihna kal zelah vawiin khan Dr. H. Lalthlangliana, Commissioner, State Election Commission (SEC), chuan DC Conference Hall-ah NGO, Kohhran, MJA, Political Party- aiawhte kawmna a nei a. Pu Donny Lalruatsanga, District Election Officer (DEO) chuan thutkhawm hi kaihruaiin, Pu V.L. Remliana, Secretary (SEC) leh Pu Vanlalchhuanawma Chhawngthu, Deputy Secretary (SEC), ten Commissioner- hi an tawiawm a ni.

Dr. H. Lalthlangliana chuan kalkhawmte hnen a lawmthu sawina a nei hmasa a. An lo kal chhan leh thutkhawm neih a nih chhan ber chu LADC hnuaia MDC inthlanpui lo awm tura inbuatsaihna kalpui chin lo enfiah an nih thu a tarlang a. Mipuiten an duh zawng zalen tak a an thlan chu thil pawimawh hmasa a nih thu sawiin, theihtawp chhuah a nih thu a tarlang a. Commissioner - chuan inthlan ni puan thuai a nih dawn thu tarlangin, party - te chu mipuite zalenna tibuai khawpa che lo tur leh thu dik leh dawt tello a inzuar turin a chah a. A bik takin SEC atanga zawm tur thuchhuah ang angte lo zawm sak turin a ngen nghal a ni. Dr. H. Lalthlangliana chuan NGO leh Kohhran hruaituten chu inthlanna thianghlim leh zalen a awm theih nan a theih tawp chhuahpui tur leh venpui turin a ngen nghal bawk.

Pu VL. Remliana Secretary, SEC chuan thu tawi sawina a nei a. LADC inthlanpui lo awm turah khauh taka dan kenkawh a nih tur thu tarlangin, 'Model Code of Conduct' tha taka zawm turin Party- te a chah a. A bik takin inthlanna felfai tak a awm theih nan NGO leh Kohhrante thahnem ngai taka SEC thawhpui turin a sawm a ni.

Thutkhawmah hian NGO,Kohhran, thuthar thehdarhtute leh Party aiawh an telkim tha hle a. Inthlanna felfai leh thianghlim taka awm turte, inthlannaa hriat tur pawimawh tak tak leh hma lak ho dan turte sawiho a ni a. Zawhna leh chhanna hun tha tak neih nghal a ni bawk.

Vawiin thutkhawmah hian NGO, Kohhran, thuthar thehdarhtute, Political Party- aiawh leh LSA hruaitute an tel thei a. Pu Donny Lalruatsanga chuan kalkhawmte hnena lawmthu sawina neiin hun a khar.