2059/2025-2026

Lawngtlai, 3rd November 2025 : Lai Autonomous District Council (LADC) hnuaia 12th Member of District Council (MDC) inthlanpui 2025 - lo awm tur atan a inbuatsaihna kal zelah vawiin khan Dr. H. Lalthlangliana, Commissioner, State Election Commission (SEC), chuan DC Conference Hall-ah Election Official- te thutkhawm a neihpui a . Pu Donny Lalruatsang, District Election Officer, chuan thutkhawm hi kaihruaiin, Pu V.L. Remliana, Secretary (SEC) leh Pu Vanlalchhuanawma Chhawngthu, Deputy Secretary (SEC), ten Commissioner- hi an tawiawm a ni.

Dr. H. Lalthlangliana, chuan inthlanna fel fai, thianghlim leh hlawhtling tak nei turin Election Official- te an pawimawh hle a ti a. Mipuiten zalen taka an duh zawng an thlanchhuah theih tura theihtawp chhuah turin a chah a. Commissioner chuan inthlanna tura hmalak tawhna chinah inbuatsaihna a tha hle tih a tarlang a. Tihfel ngai awm ang angte a hma lama tifel tur te, training tha taka pe tur leh Official-te an mawhphurhna tha taka hlen turin a chah nghal bawk.

Pu Collin Hlychho Election Officer chuan inthlanna fel fai tak nei tura hmalakna hrang hrangte tarlanna a nei a. Pu PC Lalchunglura Superintendent of Police Lawngtlai chuan dan leh thupek kenkawh kawngah hmalakna kawng hrang hrangte a tarlang bawk a. Felfai leh hlawhtling taka inthlan neih a nih theih nan a thil tul leh tangkai tak takte, hmabaka tih tur awm ang angte sawihona neih nghal a ni.

LADC huamchhungah hian Polling Station - 111 (+ 1 Auxiliary PS) awmin, Returning Officer- 3, Asst. Returning Officer- 3, Sector Officer - 17 an awm a. Vote nei zawng zawng hi mi - 56,857 an awm mek a ni.

Thutkhawmah hian Election Official- te an tel kim tha hle a, Pu Donny Lalruatsanga chuan lawmthu sawina neiin hun a khar.