Ni 18.2.09 zing dar 7 khan Health Minister chuan Mizoram State Health Care Scheme hnuaia Bill tang engemaw zah chu Private Hospital leh sorkar hospital then te hnenah Cheque a pe chhuak ta.

Hun rei tak chhung Health Care scheme chu tluang takin a kal a. Nikum October thla  atang khan bill a tam tak em avangin Reliance lam in bill lem te a awm thei em tih chhuanlam siamin endik hna (Audit) an nei a , chuvangin nikum October thla atanga bill lut chu pending char char a ni ta a. Hemi avang hian a chhawrtu mipui te ah harsatna nasa tak a awm a ni tih hria in leh Reliance lamin Agreement an bawhpelh nasa bawk nen Mizoram State Health Care Society lam chuan nasa takin Bill tang awm te chu pechhuak vat turin Reliance lam hotute chu an nawr bawk a. Hei mai bakah Health Minister zahawm Pu Lalrinliana Sailo chuan mipuite mamawhna leh an harsatna tawh mek te hriain nasa takin a rang thei ang bera sutkian tumin hma a la bawk nen, chumi zarah chuan cashless bill tang Rs.16200030/- leh Reimbursement bill Rs.1002712/- avaiin Rs.17202742/-  chu 18.2.2008 zing dar 7 khan Mizoram State Health Care Society Office, Dinthar ah Reliance hotute nen Health Minster chuan Hospital hrang hrang hotute hnenah a sem chhuak. Minister chuan thu tlem sawiin, mipui rawngbawl kan ni tih hria a rintlak a hna kan thawh a tul thu leh harsatna siam zawng a hna kan thawh hian mipui te’n kan chungah rinna an hloh thei a ni tih hrereng chunga hna thawk tura a duh thu sawiin, mipui lam pawn rilru thianghlim tak pu a thil kan tih thin a pawimawh thu a sawi bawk. Reliance lam pawhin tun atang chuan tunhma ang a bill siamfel zung zung zel an intiam bawk a ni.

Mizoram State Health Care Scheme hi tihtawp tumna a awm  lova, tun aia changtlung zawk a chhunzawm tum a niin, sawrkar kumthar ah chuan nikum lam aia tha leh awlsam zawk a kalpui a nih theih nan leh mipui ten awlsam zawk a Bill an hmuh theih nan ruahmanna chak taka hmalak mek  a ni.