Khawvel pumhuapa infiamna lar tak pakhat Taekwondo-a International Referee tling pha Mizo 3 - V.L.Sawma, Pu Joseph Thansanga leh Tv.V.Lalnienga - te chu vawiin khan an hlawtlinna lawmpui nan Sports Minister-in thingpui a inpui.

 

 

Sports Minister Pu Zodintluanga chuan Mizote tan ni chhinchhiah tlak a ni a, hetianga Mizo tlangvalte zingah hlawhtling an awm hian thangthar lo la kal leh zel te hnenah chona lian tak siam ngei se a duh thu a sawi a ni. Minister chuan sports mamawh bungrua leh hmunhma theihtawpin Mizoram sorkarin a ngaihtuah dawn a, chung kan tlin hunah chuan Mizote theihna leh thiamna tak tak cho chhuah tham a awm em tih chu kan inenna tur a ni ang a. Hnamdang leh state dangte kan el pha tak tak em tih chu a takin a lang dawn a ni, a ti. Infiammite chawhphurna tura tangkafai sem thin te pawh naupang zawk te lamah chuan a dawngtu pawh an thahnem viau a, Senior Level-ah erawh hetiang dawng pha hi an khat pharh mai thin hian infiamna lamah teirei kan peih loh zia a tarlang a ni thei em tiin zawhna a siam a, hei hi chona lian tak tan kan lak lehzualna tur pawh a ni ngei ang, Pu Zodintluanga chuan a ti.  

September ni 3-7, 2009 chhunga Bangalore, India hmuna 56th International Referee Seminar & 69th International Referee Refresher Course-a hian ram hrang hrang 14 - India, Malaysia, China, Korea, Nepal, Iran, Afghanistan, Tajikistan,  UK, Isle of Man, Ireland, Iceland, Sweden, Australia leh New Zealand - atangin mi 177 an tel a. Mizoram Amateur Taekwondo Association (MATA) atanga zu tel mi 3 - Pu V.L.Sawma, Chief Technical Director leh Sr. Vice-President; Pu Jseph Thansanga, Gen. Secretary leh Tv.V.Lalnienga, Asst Gen. Secretary - te hi ni 3 chhung training an nei hnuah Written leh Practical-a exam an nei a, hlawhtling takin training an zo a ni. Mizoram Olympic Association (MOA)-in a pawm sports discipline 16 zingah International Referee ni thei awm chhun leh hmasa ber an ni a, World Championship leh Olypic thleng pawhin Referee thei tur an ni.

Kumin 14-18 October chhung khian Copenhagen, Denmark-ah World Senior Taekwondo Championship 2009 neih tur a ni a. Heta tel tur Mizo nula Lalsangzuali, Champhai (Welter Weight) pawh tunah hian Bhopal-ah training a nei mek a ni.