Vawiin khan I & PR Conference Hall ah Mizoram State Higher Education Council Meeting Pu R. Romawia Minister, Higher & Technical Education kaihhruaina in neih a ni a, Rashriya Uchhatar Siksha Abhiyan ( RUSA ) Scheme hnuaia hma lakna te bakah Higher & Technical Education tih hmasawnna tur thil hrang hrang te rel a ni.

Meeting hmasa lama chhawpchhuah hmalak na leh la bawhzui mek te Pu R. Romawia chuan chipchiar takin a tarlang a. RUSA  in a beisei ang project la hmuh loh dan leh bawhzui zel dan tur member te a hriattir.

Prof. K.L Pradhan, Member Secretary in hma lakna hrang rang report a pe a ni. RUSA hnuaiah College tihmasawnnan Infrastructure Grant 1st installment College 21 hnenah Rs. 11.25 lakh theuh tunhnaiah pek chhuah an nih tawh thu sawiin, heng College te hi 12th Plan chhungin Rs.200 lakh theuh hmu tura ngaih an nih thu leh Govt. Hrangbana College leh Govt. Zirtiri Residential Science College te Model College a hlan kaina tur RUSA norms angin Rs. 400 lakh pek tura Project Approval Board (PAB) -in a phalsak tawh pawh DPR pawm niin 1st Installment Rs. 45 lakh ve ve dawng turin Ministry of Human Resource Development, New Delhi in a sanction tawh thu a sawi a. Mizoram Engineering College dinna tura Rs. 2600 lakh RUSA, PAB in a phalsak pawh DPR thehluh a nih tawh thu a sawi.

Higher Education hnuaia thawktu, teaching leh Non-teaching staff in daih lohna chungchang pawh meeting ah hian sawiho a ni a. He in daih lohna phuhruk nana thawktu lak belh anih theih nan Sorkar-ah thlen nise tiin Higher & Technical Education hmasawnna tur kawng hrang hrang sawiho leh rel a ni.

State Higher Education Council ah hian Office Bearers 3 bakah member 18 awmin, State Higher Education Officials, pawl hrang hrang aiawh (Academic Associations, Chamber of Industries, YMA) leh State chhung leh pawn lam atangin Higher Education a mi thiamte an tel a ni.

Pu H.Zothangliana, Parliamentary Secretary, H&TE in lawmthu sawiin Meeting hi khar a ni.