Vawiin khan Mizoram State Law Commission chuan Secretariat Conference Hall-ah an meeting vawi 26-na chu an Chairman Pu John Siamkunga, MLA hovin an nei.

He meeting-ah hian meeting hmasa lama an thilrel tawhte bawhzui dan sawiho nan hun hman a nih bakah “The Mizoram Scheduled Tribes and Scheduled Castes (Regulation of Issuance and Verification of Community Certificates Bill, 2014)” chu ngaihtuah a ni a. He Bill in a tum chu Community Certificates, entirnan – Tribal Certificate-te a nei theitu dik tak chauhvin an neihna turte, a dil dan tur te, hemi chungchanga lungawilohna neite’n an thlenna tur thuneitu Appellate Authority leh thuneitute’n Certificate an lo pek a, a tul dan azira lo endiktu Scrutiny Committee siam dan turte a tel a. He danah hian diklo taka Certificate la te chu kum hnih (2) thleng lung in tan theih a ni dawn a ni.

The Mizoram Scheduled Tribes and Scheduled Castes Bill hi Cabinet-in a thuphung chuan a pawm tawh a; Law Commission-in lo zir chiang leh se tia a phutna angin zir nawn a ni a. Assembly-a put luh turin a changtu Home Department-ah thawn let leh tura rel niin, a tihhlawhtlin kawngah pawh harsatna dang a awm loh beisei a ni. Vawiin meeting-ah hian Mizo inneih, inthen leh rokhawm chungchangte leh thildang pawimawh sawiho a ni bawk.