Food, Civil Supplies and Consumer Affairs Minister Pu John Rotluangliana hovin vawiin chawhnu dar 1:00 khan ama office chamber ah FCS&CA Department hotute, CYMA leh Consumer Union hotu te an thukhawm a, Mizoram-a LPG (Gas) harsatna chungchang leh a sutkian dan tur te ngun takin an sawiho.

Mizoram-a gas harsatna thlentu ber chu gas tihchingpen leh black-a hralh ruk thin hi a ni tih hriain meeting chuan hemi ven nan hian sorkar department, CYMA leh Consumer Union te tanghova, khauh taka vil ni se an ti a. Hetiang tih ching te pawh na taka hrem thin zel ni se an ti bawk. Gas tihchingpen leh black-a hralh ruknaa inhnamhnawih motor te pawh man zel ni se tiin taxi te pawh man an nih chuan an taxi permit tihtawpsak thlengin hrem thin ni se tihte an rel a, motor leh gas cylinder man te dahkhawmna tur te pawh hmun remchang ruahman ni se an ti bawk. Aizawl khawpui chhung hmun hrang hranga gas cylinder check hna thawk tur hian Legal Metrology department thawktu leh CYMA leh Consumer Union te group hrang hrangah inthena hmalak tum a ni a, kawngpui dung (highway)-a gas tihchingpen leh hralh ruk ven hna thawk turin CYMA hmalaknain Branch hrang hrang YMA te, a vil hna thawk tura ngen an ni dawn bawk a ni. Gas cylinder tihchingpen emaw, hralhruk vanga man reng reng te chu mipui vantlang hriatah media hmanga chhuah thin ni se tih te meeting ah hian rel a ni bawk. Gas cylinder pawh a buk a dik leh dik loh chian nan a semna hmunah buk chhunzawm zel ni se tih te an rel bawk.

Minister chuan mipui tana gas rualkhai taka sem a nih theih nan gas tihchingpen leh hralhruk awm thin chu uluk taka vil a tul a ni tiin huaisen tak leh khauh taka hma la turin kalkhawmte chu a sawm a, mipui tan sorkar leh tlawmngai pawl te chu tha taka an thawhho zel a pawimawh thu a tarlang bawk.

Vawiin meeting ah hian Parliamentary Secretary Pu T.T. Zothansanga leh FCS &CA Secretary Pu R. Lalvena te pawh an tel a ni.