4646/2024-2025
Aizawl, the 13th March, 2025: Vawiin chawhnu dar 3:00 khan Gauhati High Court, Aizawl Bench Conference Hall-ah Environment ven leh humhalhna Dan, Sik leh sa inthlak chungchang leh nakin hun thlenga nghawng tha lo nei lo tura tihdan phung tha inzirtirna, Mizoram State Legal Services Authority buatsaih 'Public Education on Environment Protection & Conservation Laws, Climate Change and Sustainable Practices' tih kharna hun hman a ni a. He hun hi Justice Sudhanshu Dhullia, Judge, Supreme Court of India leh Justice Ujjal Bhuyan, Judge, Supreme Court of India-te chuan khualtha niin an hmanpui.
He programme hi Pi F. Laltlansangi, Mizoram Judicial Service chuan kaihruaiin kalkhawmte lawmna hun Member Secretary, Mizoram SLSA in a nei a. Hemi hnu hian campaign laia hmalakna hrang hrang an neihte DLSA Secretary hnen atangin ngaihthlak a ni a. NALSA theme song ngaihthlak a ni bawk.
Inthlahna hun hman chhunzawm niin, Justice Sudhanshu Dhullia, Judge, Supreme Court of India, Justice Ujjal Bhuyan, Judge, Supreme Court of India, Justice Michael Zothankhuma, Judge, Gauhati High Court, Justice N. Unni Krishnan Nair, Judge, Gauhati High Court leh Secretaries, MSLSA leh District Legal Services Authority-te bakah sawm bik mi pawimawhte he hunah hian an tel bawk a ni.
Justice Michael Zothankhuma, Judge, Gauhati High Court chuan inlawmna thu sawiin, inthlahna thuchah sawitu Justice Ujjal Bhuyan, Judge, Supreme Court of India chuan MSLSA chu kum tam tak chhung Executive Chairman anga a lo vil tawh thu leh hetianga urhsun taka special campaign an kalpui chu lawmawm a tih thu a sawi a. Campaign neihna hmun apianga mipuite'n phur leh thatho taka an lo tawiawm zelnaah lawmthu a sawi a. Special Campaign atang hian mipuite ram humhalh kawngah nasa taka an thanharh tawhzia chiang taka a lan thu sawiin, he campaign chhunzawm hian sawrkar thuneitute pawhin hemi kawnga nasa taka hma an lak chhunzawm zel a beisei thu a tarlang bawk.
Thusawitu dang Justice Sudhanshu Dhullia, Judge, Supreme Court of India chuan rampum huapa Special Campaign kalpui a ni chu lawmawm a tih thu sawiin, hemi kaltlanga thil zirte chu ramchhung mai ni lo khawvel puma kan ngaih pawimawh tur thil a nih avangin tute pawhin sik leh sa, nungcha, ramngaw leh lui dungte humhalh chhunzawm kawngah mawh kan phur a ni tiin, mimal, department leh sawrkarte hma la chhunzawm zel turin a chah a. Thalaite leh thangthar zelte pawhin boruak thianghlim leh ram nuam tak an neih hi kan ram danpui hnuaia an chanvo pawimawh tak a ni, a ti a. Thalaite leh naupang zawkte pawhin ram leilung humhim duhna rilru an nei nasa hle tih chiang takin lemziak intihsiakna atanga a lan thu a sawi bawk.
Justice Ujjal Bhuyan, Judge, Supreme Court of India chuan Special Campaign hnuaia Middle School Level and High School Level Drawing Competition buatsaih a ti thate hnenah lawmman a hlan a. Middle School Level Drawing Competition-a lawman dawngtute chu a hnuaia mite hi an ni:
a) Pakhatna – B.Zonunmawii, Springdale Academy, Champhai
b) Pahnihna – Vanlalhlimpuii, Little Flower, Serchhip
c) Pathumna – Lalthlamuanpuii, Adventist English School, Lunglei
High School Level Drawing Competition-a lawman dawngtute chu a hnuaia mite hi an ni:
a) Pakhatna – Zodinpuii, JM High School, Serchhip
b) Pahnihna – Amy H.Zothanpuii, Govt. High School, Lunglei
c) Pathumna – Grace Lalmuanpuii, Pinehill High School, Champhai
Lawmman hian sumfai leh citation a keng tel a ni.
College Level Essay Competition a lawmman dawngtute chu a hnuaia mite hi an ni:
a) First Prize Vanlalzawni, Govt. Serchhip College
b) Second Prize- Ramnunmawii, Govt Lawngtlai College leh Sarah Mamsawmzuali, Pachhunga University College
c) Third Prize Evelyn Lalduhzuali, Govt. Serchhip College; HC Vanlallawmzuali, Govt. Lawngtlai College leh Esther Lalmawi puii, Pachhunga University College
College Level Essay Competition buatsaih a ti tha te hnena lawman sem chhunzawm a ni a. Heng lawmante hi Justice Sudhanshu Dhullia, Judge, Supreme Court of India chuan a hlan a. Hemi hnu hian Justice N. Unni Krishnan Nair, Judge, Gauhati High Court chuan lawmthu sawiin hun hman hi a khar a ni.
