Nimin khan Mizoram State Legal Services Auhtority (MSLSA) Member Secretary Pu Vanlalenmawia, MJS chuan Lawngtlai District Court leh District Jail te a tlawh.

District Court-ah hian Chief Judicial Magistrate (CJM) Pu BT Lala Sakachep, MJS leh thawktu dangte'n lo dawngsawngin, District Court kalpui a nih dan te, tichangtlung tura hma lakna awm leh hmachhawp te an sawi ho va. District Court tihchangtlun nana ngaih pawimawh an neihte CJM leh a thawhpuite hian an lo thlen a ni.

Member Secretary hian District Legal Services Authority hnuaia Legal Aid Counsel awmte a kawm bawk a. An hna atana hriat tur pawimawhte sawipuiin, hriatthiam loh an neihte a hrilhfiah nghal.

Hemi hnu nimin tlai lam khan Pu Vanlalenmawia hian Lawngtlai District Jail tlawhin, jail tangte hmaah thu a sawi a. Jail tan chhan tam ber chu ngaihsam vang a nih thu sawiin, vawilehkhata hlawkna ringawt um lo va, jail atanga an chhuah hunah pawh an thil tih thinte bansan a, nun dan pangngaia nun tum turin tangte chu a chah a. Dan lamah harsatna an nei a nih chuan thuneitute hnenah thlen thuai thin turin a chah bawk.

Pu Vanlalenmawia hian nimin tlai khan Lawngtlai chhuahsanin Lunglei a pan nghal a ni.