4408/2024-2025

Aizawl, the 24th February 2025: State dan siamtu (Legislator) ten HIV/AIDS lama hma an lakna tur committee sang, Mizoram Legislative Forum on AIDS chu vawiin  khan I&PR Conference Hall-ah Health Minister Pi Lalrinpuii kaihhruaina hnuaiah an thukhawm.

Meeting kaihruaitu, Health Minister Pi Lalrinpuii chuan HIV chungchanga Mizoram dinhmun chu mipui nawlpuiin kan vei a tul tawh zia sawiin, Legislator te pawhin tun aia nasaa hma an lak a pawimawh tawh tak meuh a ni a ti a. India rama HIV hluar dan (prevalence rate) 0.2% anih lain kan state chuan sang ber niin a hluar dan chu  2.73% a ni tih a sawi.

I&PR Conference Hall, Aizawl a Mizoram Legislative Forum on AIDS thutkhawmnaah hian MSACS Project Director Dr. Jane R. Ralte chuan Mizoram HIV dinhmun report pein January 2025 thleng HIV kai mi 32287 hmuhchhuah an ni tawh a.  He natna avanga thi hi hriat theih chinah 5511 an tling tawh tih sawiin, nikum 2024 April leh kumin 2025 January chhungin HIV 1769 hmuhchhuah an ni tawh tih a tarlang bawk.

Nikum April leh kumin January inkara HIV kai thar hmuhchhuah zat atanga za zela 67 chu invenna tel lova sex hman atangin a ni a, hriau thlianghlimlo inhmantawm atanga kai hi za za zela 30.44 an ni.

Mizoram chu HIV natna avanga hun engemaw chen a thalo zawngin langsar mah ila, tunhnaiah hmasawnna hmuh tur duhawm tak tak a awm ve zela, natna hrik kai thar an tlak hniam bakah he natna avanga thi nasa taka an tlem tawh thu MSACS Project Director chuan a sawi a ni.

Vawiin Health Minister hova MLA leh MSACS aiawh thenkhatte inkawm khawmnaah hian mahni inringhlel te tan thisen test thuai a pawimawh thu leh hrisel tha pangngai taka awm nan ART damdawi ei uluk a tul thu sawi a ni a. HIV darh zel tur venna kawnga pawimawh tak Drop-in-Centre mumal taka hman tangkai leh theih dan turte rawtna siamin sawho a ni a. 

MLA te hian HIV darh zel tur dona kawnga tha thawh an inhuam thu sawiin, kum 2024-2025 chhungin MLA fund atangin cheng sing 5 theuh HIV hrik kai ten chatlak lova ART damdawi an lak theih nan, ART panna tur senso atan MSACS hnena hlan an remti bawk a ni.