4407/2024-2025

Aizawl, 24th February, 2025 : Institute of Advanced Studies in Education (IASE) chuan kum 50-na (Golden jubilee) an lawmna kal zelah Golden Jubilee puala an siam relief sculpture chu Art & Culture Department minister, khuallian ni bawk Pu C. Lalsawivunga chuan a hawng a. Art & Culture minister chuan relief sculpture a hawng thei chu lawmawm a tih thu sawiin college tana hmasawnna chhinchhiahtlak tak a nih thu a sawi.

Relief sculpture siamtu IASE-a Art instructor Lalnunpuia Kawlni chuan relief sculpture a siam chhan tlangpuite sawiin heng lung ker te hi hmanlai Mizo pi leh pute hunlaia an nunphung leh khawsak dan hriat vek theih ni tawh lo mah se, a hunlaia an khawsak dan tlangpui chhinchhiahna pawimawh tak a ni a. IASE chu zirna in a nih angin zirlaite’n Mizo pi leh pute khawsak ṭhin dan tlangpui an lo hriat theih nana siam a nih thu a sawi.

Minister C.Lalsawivunga chuan IASE Golden jubilee souvenir chu tlangzarhin IASE Golden Jubilee lawmnaa sawm a nih chu ropui a tiin zirtirtute leh zirlaite chungah lawmthu a sawi a.

IASE-in hma a sawn zel chu lawmawm a tiin zirlaite hnenah zirna in ṭha taka lehkha an zir thei chu an vanneih thu a sawi a. “Ram hmasawnna kailawna lawn tur chuan thiamna leh finna a ngai a, chu chu zirna hmangin miin a nei thin. Chumi finna rah chhuah chu hre thar ula; zirtirtu in nih hunah pawh zirlaite hnenah zirlai piah lamah tumruhna leh thawhrimna tuh rawh u” tiin a sawi bawk.

Minister chuan ringtu kan nih anga Pathian ṭih a, nu leh pate chawimawi turin zirlaite chu a fuih a. Tunlaiah ruihhlo a hluar nasa êm êm a, chhungkua leh khawtlangin a tawrh ṭhin avangin ruihhlo laka fihlim tur leh,  “Hlawhtlinna bul chu thawhrimna” a ni tih hre reng chunga tum mumal leh taima taka lehkha zir a, hlawhtlinna chang ngei turin a fuih a ni.