Vawiin chawhma dar 10:30 khan Pu R. Romawia, Art & Culture Minister chuan Vanapa Hall-ah Mizoram State Museum-a Mineral Gallery thar a hawng.

Mineral Gallery hawnna inkhawm Pu Ngurbiaka, Director Art & Culture Deptt. kaihhruaiah Pu R. Romawia chuan kan ramah hian leilung hausakna leh ramhmul damdawi chi hrang hrang Pathianin a lo dah a, hengte pawh hi haichhuak tur in ramdang mi nilovin kan mithiamte, zirlaite leh helama thawk tute pawhin tan ila ang u, tiin Mizoram State Museum a Mineral Gallery kan neih theih nana thahnem ngai taka hmalatu Er. Hriata Chhangte chungah lawmthu a sawi.

Mineral Gallery thar kan neih chuan Museum lama thawktute pawhin tan lak lehzual a ngai a. Mipuiin an hriat turte leh pawimawhte sawifiah thei tur a in buatsaih a ngai a ni Minister chuan a ti bawk.

Er. Lalhriatrenga Chhangte pawhin thu sawiin kan ram leilung hausakna hi a neitute ngei hian kan haichhuah a tul a. Chumi ti tur chuan tha kan thawh ve a a ngai a ni, a ti.

Pu Lalchuailova Museum Curator in Technical Report a pe bawk. Mizoram State Museum-a Mineral Gallery hawn tharah hian leilung hausakna hlu tak tak Lung man tam leh hlu chi hrang hrang te, tuialhthei-te nen avaiin Mineral Samples 65 dah a ni a. Hawnna inkhawm neih zawhah hian Vanapa Hall Gallery-ah mipui tan Exhibition buatsaih nghal a ni a. Mizoram State Museum - Mineral Gallery-a Mineral Samples-te hi mizo zinga Mining Engineer hmasa ber Er. Lalhriatrenga Chhangte, Dy. Controller of Mining, Indian Bureau of Mines, Bubhaneswar hmalakna- India rama mining company lian tak tak heng - SARDA MINES Pvt. Ltd, Barbil, Keonjhar, Odisha, Indian Rare Earths Ltd leh ONGC, Sibsagar leh TATA STEEL Ltd-ten Mizoram State Museum tan a thlawnin an rawn pek a ni.