Chief Minister Pu Lal Thanhawla hoin vawiin khan a office cabinet roomah State Disaster Management Authority (SDMA) in meeting nei.

Meeting-ah hian sawiho tur agenda 6 chhawpchhuah a ni a. Chung zingah chuan central sorkar rawtna angin Mizoramah Disaster Insurance Policy siam ve chungchang sawiho a ni a. Insurance policy neih a tulna tarlanah chhiatrupna a thlena chhiat tawkte tana chhawmdawlna leh tanpuina a tam zawk theihna tur anih vang a ni ber a. Hei hi tunah mai chuan a guidelines te ala awm loh avangin sorkar hian lo hre ve phawt se meeting chuan a ti a. Ramhlun Sports Complex hmuna chhiatna thleng thuam that hna thawh mek chungchangah hnathawh a that tawk loh avanga executive agency thlak chungchang sawiho a ni a. Third party in hna thawh mek chu endik leh phawt nise, a hna thawktu atan pawh SDMA ni mai se meeting chuan a ti bawk a. National Disaster Response Force hmun atan central sorkarin Mizoram sorkar chu ram ngaihtuah sak tura a rawn tih chungchangah Revenue department nen hmun remchang tur ngaihtuah nise a ti bawk a. Central sorkarin Jammu & Kashmir a tuilian tuarte chhawmdawl nana kawmawl pe ve tura Mizoram sorkar a rawn hriattir pawh sawihoin, Ministry of Textileah SDMA atangin sum Rs. 15 Lakhs pek ni se tiin meeting chuan a ti bawk a ni.

Meeting-ah hian DM&R Minister Pu C.Ngunlianchunga, UD&PA Minister Pu Zodintluanga, Chief Secretary Pi L.Tochhong, DM&R Principal Secretary Pu C.Lawmsanga leh DM&R official te an tel a ni.