401/2023-2024

Aizawl the 11th May 2023: India ram hmundangte rualin vawiin khan National Technology Day vawi 25-na chu Directorate of Science & Technology huaihawtin MINECO-a Innovation Facility Centre-ah lawm a ni a, Mizoram State Planning Board Vice-Chairman Pu H. Rammawi chu khuallian niin Biotechnology Cell a hawng nghal a, Planning and Programme Implementation Department Secretary Pu Lalmalsawma Pachuau chu khualzahawm a ni.

Khuallian chuan ram hmasawnna tluantling nei tur chuan technology thiamna hman tangkai a pawimawh a ni tiin Technology Day hman a ni chu a lawmawm hle thu a sawi. Technology hrang hrangte chu Artificial Intelligence (AI) an tih chuan a khaikhawm thu leh a innghahna ber a nih thu sawiin ‘AI lamah Mizo ten rilru kan sen a, tan kan lak a ngai tawh a ni’ a ti.

Pu H Rammawi chuan technology-a sang ramte chu khawvela ram hausa leh changkang an ti tiin chung ramte chuan an ram leilung hausakna haichhuah kawngah tan an la nasa a, taima leh chhel takin an ram leilung hausakna an chhawr tangkai a ni a ti. Thil thar hmuchhuaktu (Innovators) kalkhawm thiam tak leh fing tak tak te chu an kal zelna turah a aia nasa zawka tan la turin a chah a, an thiamna leh theihnate chu an mahni mai bakah Mizoram hmasawn nana hmang turin a chah a ni.

Khawvel thang chho mek milin Mizo-te pawh rilru leh sutthlek tih changkan ve zel a tul thu sawiin kalkhawm mipuite chu technology hmasawnna atana theihtawp chhuah turin a sawm bawk a, thil thar ching chhuak tute chu thlawp thiam a, dawmtu leh fuihtu ni zel turin a chah a ni.

Khualzahawm Pu Lalmalsawma Pachuau pawhin innovators-te pawimawh zia sawiin thil awmlo atanga awma siamtu (zero to one) leh hmasawnna thlentu an ni a ti a, puihbawma thlawp an ngai hle a ni a ti. Pu Lalmalsawma Pachuau chuan innovators-te chu mi ngaihsanawm tak an ni tiin kawng engkimah an mahni pui turin sawrkar a awm reng a ni a ti bawk.

Vawiina National Technology Day lawmna inkhawm-ah hian Pu H. Lalsawmliana, Chief Scientific Officer, DST chuan mipui lawmna thu a sawi a, DST-a Scientific Officer Dr. Aldrin Malsawmtluanga’n Technology-a Mizoram thanchhoh dan hrang hrang a lem nena entirna a nei bawk . Pu Samuel Lalmalsawma, Principal Scientific Officer, MISTIC chuan dan ang taka an khawl siamchhuaha neitu nihna Patent dawngtu mi pali leh he lama India rampum huapa inelnaa lawmman dawng mi pakhat (1) hnenah lawmpuina certificate leh pawisa fai hlanna a kaihruai a, National Innovation Foundation atangin Pu R. Lalbikzuala chuan khawl siamchhuah tharte chu thlan bik-te hnena hlanna a hmang bawkin Principal Scientific Officer, DST Pu. K. Lalrammuana’n lawmthu sawiin hun a khar a ni.

Vawiina National Technology Day lawmna hi Science & Technology hnuaia MISTIC, MIRSAC, Science Centre Governing Body leh Executive Body member-te, State Planning Board member, Women’s Polytechnic zirlai leh zirtirtu te, Science leh Technology hmasawn nana thawktu tlawmngai pawl hrang hrang – Mizoram Science Society (MSS), Science Teachers’ Association, Mizoram (STAM), Mizo Academy of Sciences (MAS), Mizoram Mathematics Society (MMS), Geological Society of Mizoram (GSM), Biodiversity and Nature Conservation Network (BIOCONE), Mizoram Information & Technology Society (MITS) bakah Science lama mi hmasa- sul lo sutu engemaw zatin an telpui a ni.

National Technology Day hi kum 1998-a India-in ama kutchhuak technology khawvel hriata a phochhuah ni a ni a. Khatih hunlai khan khawvel hriatah India ram chuan Nuclear siam thei ram a nih zia lantir nan Rajasthan a Pokran-ah Nuclear hlawhtling takin a enchhin a, 'Trishul' Missile hlawhtling takin a enchhin bawk, Thlawhtheihna 'Hansa-3' an vuah chu he mi ni hian hlawtling takin a thlawhtir bawk a ni. Kum 1999 atang khan kum tin ram hmasawnna atana technology pawimawhna inhrilhhriatna leh inzirtirna hun atan he ni hi hman thin a ni.