4382/2024-2025

Aizawl dated 21st January 2025: Vawiin chawhnu khan Planning & Programme Implementation Department Committee room, Aizawlah Sawrkar department 15 kaltlang a Progress Partner dilna lutte endikin Mizoram State Policy Coordination Committee hnuai a Apex Body chuan thutkhawmna an nei a. Implementing Department 15 atanga Detail Project Report thehluh 520 endik a ni.

Thutkhawmna kaihruaitu Dr. KC Lalmalsawmzauva, Adviser to Chief Minister (Implementation of Hand-holding Policy) chuan Bana Kaih Scheme hnuai a kuthnathawktute thlai thar hralh tan mek a ni chu lawmawm a tih thu sawiin hemi rual hian eizawnna bultan tum leh eizawnna nei sa, tihchangtlun tum te, bana kaih tlakte thlang chhuak tur a thutkhawmna neih a ni chu lawmawm a tih thu a sawi.

Thutkhawm a tarlan danin Hand-holding scheme hnuai a Progress Partner ni tur a dilna hi Implementing Department 15 kaltlang hian 11430 a awm a. Implementing Department-te zirchianna atangin hmalak pui tlak a ngaih, Detail Project Report thehluh 520 chu vawiin hian Apex Body hian a endik a ni. DPR thehluh zawng zawng a loan dil hi Rs. 61,30,72,748 a ni a, chawhrualin DPR pakhat a loan dil zat hi Rs. 12,16,414 ang a ni. Thutkhawmna ah hian Progress Partner, Bana Kaih hmang a hmalakna ngelnghet kalpui chhunzawm zel tur a theihna neite leh midang tan a eizawnna siam thei hmalakna ngaih pawimawh a tul thu tarlan a ni a. Thutkhawmna a dilna pawmte hi Bank-in uluk takin a endik leh tur thu tarlan a ni bawk.