4383/2024-2025

Aizawl, the 21st February, 2025: Vawiin khan Mizoram State Commission for Protection of Child Rights (MSCPCR) chuan Planning & Programme Implementation Conference Hall-ah Aizawl Municipal Corporation (AMC) huam chhunga Govt. Elementary School zirtirtute tan ‘Mental Health & Child Care Counselling’ leh ‘Child Rights & Child Protection Laws’ chungchang zirhona workshop a buatsaih.

Pu Jimmy Laltlanmawia, Chairperson, MSCPCR chuan workshop chhimtu zirtirtute fuihna thu sawiin, zirtirtute chu naupangte dikna leh chanvo humhalhna kawngah dan behchhana thahnemngai taka thawk tur leh thawhhona tha tak chhawmnung zel turin a chah a ni. 

Vawiin workshop hi hun hnihah then niin, hun khatnaah hian Pi Vanhmingliani, Member, MSCPCR leh Pi Priscilla Lallawmsangi, Legal Officer, MSCPCR te chuan ‘Child Rights & Child Protection Laws’ chungchang an zirtir a. Naupangte dikna leh chanvo humhalhna Dan hrang hrang- RTE Act, JJ Act leh POCSO Act-te a bik taka thlurbingin kalkhawmte zirtirna an pe a. Hun hnihnaah Pi Rebecca Lanundiki, Clinical Psychologist, Child Development Centre, Ramhlun chuan ‘Mental Health & Child Care Counselling’ chungchang zirtirna pein, naupang counselling pek dan leh enkawl dan kimchang a tawnhriat behchhanin a zirtir a ni. 

He hunah hian Pi Lalengvari, Secretary, MSCPCR chuan inlawmna thu a sawi a. Sawm bik mithiamte'n thupui hrang hrang hmanga zirtirna an pek hnuah Pu Laltanpuia, Member, MSCPCR chuan lawmthu sawiin hun hman a khar a ni.