Mizoram State Pollution Control Board (MPCB) office bulding thar, New Secretariat Complex, Khatla Thlanmual Peng a mi chu vawiin khan Chief Minister Pu Lal Thanhawla chuan a hawng. He building hi Rs. 220 lakhs senga sak a ni. 

Chief Minister Pu Lal Thanhawla chuan State Pollution Control Board chu ram leh mipui hriselna atana hna pawimawh tak thawktu an nih thu sawiin, thawktu tamlo tak chunga thahnemngai taka an hmabak an thawh thin avanga fakawm a tih thu te, building tha tak an nei chu a lawmpui bakah thawktute tiphurtu a nih ngei a beisei thu a sawi. Pollution chu khawvel changkanna in a tha lo lam thil a ken tel niin, khawpui changkang zawkah phei chuan boruak a thianghlimlo in hriselna atana pawi tham a ni tawh a. Mizoramah ngei pawh pollution a nasa telh telh a, kum tam tak kan thing leh mau ten tihchereu an lo tawk bawk a. Mizoram chu state dangte nen khaikhin chuan la hring viau mahse ramngaw dik tak sawi tur a tlem tawh hle a. Sawrkar chuan pollution avanga sik leh sa inthlak leh, mihring hriselna leh nungcha tana harsatna a thlen dan hre reng chunga NLUP kaltlanga kawng hrang hranga hma a lo lak tawh thu te Chief Minister chuan a sawi a. Khuarel chhiatna awm thin mahse mipuiin kan tih ve theih chin a awm tih hriain, sawrkar tih turah chauh dah lova, pollution kaihhnawihah ngat phei chuan mitin hi mawhphurtu kan ni tih inhre chunga hma kan lak tlan a ngai a ni, a ti. Plastic hman tlem te inzirtir a, thianghlimna leh faina ngaipawimawh in; inrenchem zir tlang a, mahni tlin phak aia khawsak tihsan tum lo bawkin; environment tichhe thei zawng nunphung chu zawi zawia thlak danglam tura inhrilhhriatna kan uar a, a bik takin zirna inah pollution control lam sawi uar tul a tih thu Chief Minister chuan a sawi a. Chutihrual chuan sawrkar pawhin tun aia nasa zawka pollution control lama hmalak a tul a tih thu sawiin, MPCB pawh UD&PA nen nasa zawka thawhhona nei se a tih thu a sawi bawk a ni. 

Mizoram State Pollution Control Board hi kum 1989 a din niin, part time Chairman kaihhruaina hnuaiah a kal a, Member Secretary bakah Board Member dang paruk an awm a. Boruak leh tui thianghlimna kaihhnawih Dan hrang hrang zawm a nih theih nan hma an la thin a; Industrial Pollution Control te, Vehicular Emmission Test-te, Air Quality Monitoring leh Water Quality Monitoring te, Waste Management/ bawlhhlawh sawngbawl bakah Public Hearing-te a nei thin a. December 2012 atanga May 2018 chhung khan Vehicula Emission Test neih tawh ah lirthei 73,256 endik zingah 2,403 chuan test an paltlang phalo a ni. 

MSPCB building thar hi Ministry of Environment, Forest and Climate Change atanga EF&CC Department kaltlanga sum hmuh hmanga sak niin, Project Amount hi Ran 220 lakhs niin, Consultancy Services (NECS) ten April 24, 2015- April, 2017 chhung khan an sa a. Building zau zawng hi a vaiin 883.3 Sq.metre niin, chhawng li (4) a sak a ni a. Basement 2 (215.15 sq.m) chu Laboratory a hman a ni a. Basement 1 (215.15 sq.m) chu parking area leh chowkidar quarter a ruahman niin, Ground Floor (226.5 sq.m) ah Main Entrance, Lobby leh Reception bakah Member Secretary/Meeting Room, Pantry, EMS Section, Toilet Block Ieh Chairman room te dah a ni a. First Floor (226.5 sq.m) ah Accountant, Establishment staffs, Junior Scientists' cubicles, Scientist B room, AEE Room, Toilets Ieh Pantry te a awm a ni. He building chung leh hnuaiah hian tuizem, a vaiin litre 12,000 dawng dah a ni a, building chhuatah hian floor tiles phah chhuah vek a ni bawk.

Vawiin State Pollution Control Board Office building hawnna inkhawm hi Pu R.C. Thanga, MPCB Chairman chuan kaihruaiin, Member Secretary Pu C. Lalduhawma chuan MPCB hnathawh dan tlangpui a sawi a. Pu Robert Romawia Royte, NECS Chief Managing Director chuan building sak a nih dan tlangpui report pe in, Dr. Lalramnghaki Pachuau, Scientist 'B', MPCB chuan lawmthu sawiin hun a khar a ni.