Lawngtlai Bawrhsap Pu N. Chakhai MCS chuan vawiin khan Lawngtlaia chanchinbu mite chu a office chamber-a lengah sawmin, District hma sawnna kawnga thawh ho dan tur a sawipui.

Lawngtlai Bawrhsap Pu N. Chakhai chuan Lawngtlai Bawrhsap hna a zawm tirhah boruak hrang hrangin a tlakbuak zui avanga chanchinbu mite nen inkawm khawmna hun a buatsaih hma thei lo chu pawi a tih thu a sawi a. Chanchinbu mite chu sawrkar hma lakna puanzar kawngah te, mipuite zirtir kawngah leh sawrkar khalh ngil kawngah te mawhphurhna lian tak chelhtu, sawrkar leh mipui inkara palai hna thawktu pawimawh tak an ni tiin, Lawngtlai District hma sawnna atan thawh hopuiah a sawm a. DC chuan amah maiin hna a thawk thei lo va, District hma sawnna tur chuan department dang te, chanchinbu mite leh mipuite nen thawh hona tha tak neih a ngai a ni tiin, District tana hna a thawhna kawngah a tul anga finchhuah zel turin MJA member-te chu a sawm nghal a ni.

Lawngtlai District MJA te hi an President Pu ZD Dengngura'n hovin, DC chu District hma sawn nan thawhpui zel an tum thu an sawi a. Chanchinbu mite’n an tih tur an hlen rualin, sawrkar thuneitu lam paw'n chanchinbu mite laka an tih tur pawh tha taka an hlen chhuah an beisei thu an sawi bawk. Lawngtlai District MJA te hian District chhunga hma sawnna hna thawhte DC leh chanchinbu mite'n a hmuna en ho thin ni se an tih thu te, sawrkar office hrang hrangte'n pisa kai hun ngai pawimawh se an duh thu leh chanchinbua advertisement chhuah tur reng reng a dan dik taka DIPRO kal tlanga pek ni se an duh thu te Bawrhsap hnenah hian an thlen a. MJA Lawngtlai District patron atana ruatna lehkha an hlan nghal bawk.

He inkawm khawmnaah hian Lawngtlai DIPRO Pu C. Lalhruaitluanga MIS pawh telin, inhmelhriatna thingpui an in ho nghal a. District hma sawn nana hma lakna tur hrang hrang an sawi ho a ni.