Vawiin khan MIFCO Chairman, Kolasib A/C Bialtu MLA ni bawk pu PC Zoram Sangliana chuan Kolasib Project Veng ah MLA Fund atanga sak MUP Building leh Gosen Special School te a hawng a, MLA Fund tho a sak Kolasib Project veng MHIP Building chu Pi Lalthlamuani, Vice President MHIP Hqrs chuan a hawng bawk a ni.

Sub-Hqrs MHIP leh MUP Building sak nan hian MLA Fund atangin cheng 6,50,000/- sen  ani a, Gosen Special School sak nan hian MLA Fund Cheng 5,06,000/- sen niin a zau zawng hi 40*26 sq ft a ni a, zirlai naupang 21 an awm mek a ni. Hemi bakah hian bialtu MLA chuan NEDP atanga cheng 15,00,000/- senga sak tur Project Veng YMA Hall sakna tur lungphum a phum bawk a ni.

Pu PC Zoram Sangliana chuan NGO te in hrang hrang sak thar hawn theih a awm chu lawmawm a tih thu a sawi a, heng in te hi mipui te tana sak an nih angin khawtlang hruaitute chu engtik lai pawha tanpui ngaite tanpui tura inhawng turin a chah a, heng in te hi harsatna tawka mamawh tu tan pawh inthlahrung hauh loa tlu lut ngam turin a chah a, mipui te tana malsawmna ni turin theihtawp chhuah chhunzawm zel turin kalkhawm khawtlang hruaitute chu a chah bawk a ni. Hemi bakah hian Gosen Special School a zirlai ngaihsak bik leh tanpui ngai bik te tana inpe zo taka thawkte chu fakawm a tih thu sawiin  Rawngbawlna thinlung nen naupang te chu enkawl chhunzawm zel turin a sawm bawk a ni.

Pu PC Zoram Sangliana hi Sub-Hqrs YMA, Sub-Hqrs MHIP, Sub Hqrs MUP hruaitute bakah Kolasib project Veng VC Member te, YMA,MHIP leh MUP hruaituten an tawiawm a ni.

 

 

Attachment

  • Loading attachment...