Vawiin khan MHIP Chanmari West Branch chuan an kum 30 din champha (Pearl Jubilee) lawmna hun Chanmari West YMA Zawlbukah an nei a. I&PR Minister leh bialtu MLA ni bawk Pu Lal Thanzara chu Khuallian niin AMC Councillor Pu C. Lalmuanpuia chu Khualzahawm a ni.

Khuallian Pu Lal Thanzara chuan mizote kan vanneihna chu mi tana malsawmna nih tum pawl hrang hrang MHIP, YMA, MUP kan nei hi a ni tiin khawtlang tan mai ni lovin sawrkar tan kut ke pawimawh tak, sawrkar hmalakna tawiawm rengtu an nihna hian an hlutna a tizual a ni, a ti a. Mizoram kan en chuan sawrkar pisa, dawr nghak sumdawng, chawhmeh zuar, sa zuar, zirna in thlengin hmeichhe hmel hmuh tur a tam zawk tawh emaw tih tur a ni a, hmeichhe chawikanna kawngah hma kan sawn nasa a, a lawmawm hle a ni, a ti a. MHIP hian khawtlang tana thil tha tam tak thawkin, chung zingah chuan ruihhlo leh a kaihhnawih thatlohna inhrilhhriatna kawngah hma an la nasa a ni, a ti a. Mizo hmeichhia ten kawng tinrengah mipa an tluk chho mek a, heng hlawhtlinnaah hian midang tana hnawksak zawnga awm lo turin a chah a. Pearl Jubilee lawmna hun lawmawm tak thlen theih nana thawktu hruaitu hmasate hre reng chungin hmalam pan zel turin duhsakna a hlan bawk a ni.

Chanmari West MHIP President Pi PC Chuaudingliani chuan programme hi a kaihruai a. Asst. Secretary Pi Lalfakzuali chuan kalkhawmte lawmna thu a sawi a. Secretary Pi Laltanpuii atangin report ngaihthlak a ni a. MHIP Hqrs President Pi Saipuii, AIKO General Secretary Pi C. Lalchhuanliani, AMC Councillor Pu C. Lalmuanpuia leh Chanmari West MHIP branch hruaitu hlun Pi C. Zopari ten thu an sawi a. June Ni 25, 1988 atanga June Ni 25, 2018 thlenga hruaitute chawimawina hun neih a ni a. Khuallian hian Pearl Jubilee lawmpui nan cheng 50,000 a hlan a. Vice President Pi F. Lalramsiami chuan lawmthu sawina in hun a khar a.Chanmari West MHIP memberte, YMA, Local Council, Civil pensioner te an tel a ni.