107/2025-2026

Champhai, 9th April 2025: Nimin khan Mizoram State Project Monitoring Committee (MSPMC) Vice Chairman Pu R. Lal Rinawma kaihhruaiin MSMPC member-te chuan Champhai khawpui chhunga hmasawnna hna thawh mekna hmun paruk an tlawh.

He hunah hian MSPMC member-te hi team hnihah an inṭhen a. Team pakhatna hi Prof Chawngsailova’n kaihruaiin anni hian
Zomi Cultural Centre, Vengthar; Passion Fruit Processing Plant, New Champhai leh Auditorium, Champhai Bethel te an tlawh a. Team hnihna hi Er. Vanlalneiha Ralte chuan kaihruaiin, anni hian Critical Care Block, District Hospital; ST Girls Hostel, Champhai College Campus leh District Court Building, Vengsang te an tlawh thung a ni.

MSPMC member-te hi sawrkar department hotute, contractor leh khawtlang hruaitu ten lo an lo dawngsawng a. Hna ṭha leh tlo, ram tana rotling leh chhenfakawm din anih ngei theih dan tur te an sawiho a, harsatna hrang hrang awm thei chinfel dan tur te sawiho a ni bawk a ni.

Vawiin chawhma dar 10:00 khan Circuit House Conference Hall-ah Vice Chairman Pu R. Lal Rinawma hovin MSMPC member-te hian Press Conference an nei a. Thuthar thehdarhtute nen inkawmhona ṭha tak neiin, MSMPC hnathawh dan tlangpui sawifiahna te bakah zawhna leh chhanna hun hlawkthlak tak hman a ni.