3180/2024-2025
Aizawl, the 25th November, 2024: Kar hmasa Zirtawpni November ni 22, 2024 khan Mizoram State Project Monitoring Committee (MSPMC) chuan an Vice Chairman Pu R. Lalrinawma hovin Durtlang Leitan atanga Sihphir kawng siam mek chu tlawhin hmalaknate an endik.
He kawng hi Km 10.250 a thui tur niin, Sawrkar laipui Ministry of Road Transport & Highway (MoRTH) hnuaia Central Road & Infrastructure Fund (CRIF) Scheme atangin cheng vaibelchhe 46.57 hmuh a ni a. EPC Mode a thawh a ni a, Contractor chu SLT Infracon Pvt. Ltd., Hailakandi, Assam niin, agreement amount chu cheng vaibelchhe 35.53 a ni.
He hnain a huamtel zingah hian a tul dan leh remchanna laia kawngchhuat zauh hna kalpui, kawngchhuat tihmuk that, Alkatra luan hlui haikhawh, kawngpui phah nghahchhan atan Dry Lean Concrete 150 mm (6 inch), 6.00 m a zau phah thar, kawngpui phah thar/Concrete Pavement, Concrete M40 Grade, 250 mm (10 inch) a chhah siam, Culvert awmsa zawm sei, Hume Pipe Culvert leh Retaining Wall siamte a tel a ni.
He kawngpui siamna atan hian Concrete Grade sang tak hman a ni a. A siamna hmanrua pawh a tha thawkhat viau a ni. Khawl hmangin hna hi thawh niin November 2024 thlenga hnathawh tawh chin hi 33% vel a ni. He hna hi January 2025 a zofel hman tura ruahman ni mah se, hna hi a khaihlak thin avangin a zawh hun tur aia rei an hman a rinawm a ni.
MSPMC te chuan he hna thawk tura Contractor inbuatsaihnate chu a tha thawkhatin an hria a. Tha taka zawhfel thuai a nih theih nan Sawrkar, Contractor leh khawtlang hruaitute thukhat vuaa tan ho a tul thu an tarlang bawk.
He hna endiknaah hian PWD Aizawl Road North Division-a Officer-te, Durtlang Local Council-te leh Sihphir Village Council te'n MSPMC te hi an tawiawm bawk.
