2405/2024-2025

Aizawl, the 7th October, 2024: Kar hmasa Zirtawpni (4.10.2024) khan Mizoram State Project Monitoring Committee (MSPMC) chuan an Vice Chairman Pu R. Lal Rinawma hovin Lengpui Airport cheithat hna thawk mek 'Improvement & Upgradation of different facilities at Lengpui Airport' chu an tlawha hmalakna hrang hrangte an enfiah.

Lengpui Airport tihchangtlun hnathawh kal mek hi MSPMC hian tun tum hi an vawi li (4) tlawhna a ni a. Hengte atanga an thil hmuh leh siam that ngai nia hriatte hi MSPMC General Body Meeting-a an sawiho hnuah rawtna engemawzat chu a mawhphurtu Department hnenah an lo thlen tawh a. PWD, PHE, P&E leh Aviation Wing-te nen kumin April ni 16 leh 18 khan hemi chungchang hi an lo sawiho tawh bakah Contractor pahnih Pu Zoramchhana leh KR Construction-te chu kovin tha taka hna a kal zel theih dan turte an sawipui a ni.

Tun dinhmunah chuan hnathawh mekte a kal tha thawkhatin an hria a. Lengpui Airport tihchangtlun hna hi ruahman ang taka a puitlin ngei theihn nan MSPMC chuan a tul angin vil zui zel a tum a ni.

MSPMC Vice Chairman hi Er. Lalthanzuala Ralte, Secretary; Pi Vanchhungi, Task Force leh MSPMC Member dang; Er. Lalrinawma, Prof. Chawngsailova, Pi Lalremsangi Fanai leh Pu Samuel Zoramthanpuia te'n an tawiawm a. Nodal Department; PWD, P&E, GAD Aviation Wing hotute'n MSPMC Team-te hi an lo dawngsawng a ni.

Hemi hnu hian Mizoram State Project Monitoring Committee Team-te hian Steel Arch (Semi Through Bridge) lei dawh mek, NH44-A a Tlawng lui kanna tur hnathawh mek chu an tlawh bawk a. He lei hi Ministry of Road Transport & Highways, Govt. of India project a ni a. EPC Mode-a thawh niin, contractor chu Poddar Infratech Pvt. Ltd., New Delhi a ni. Contract Length hi 545.300 metres niin he hna atana Agreement Amount chu cheng vaibelchhe 36 leh nuai 99 (36.99 crore) a ni.

Lei dawhna hmanraw hrang hrangte chu Testing Laboratory-a test hnuah a tling chauh hman thin a nih thu MSPMC Team-te hi hrilh an ni a. Hna thawh tawh chin hi MSPMC chuan tha thawkhatin a hria a, he hna hi December, 2024 ah thawh zawh theih beisei a ni.

MSPMC Team-te hi Er. Lalthanmawia, Sr. SDO, PWD leh a thawhpuite bakah Pu Sanjay Tiwari, Mech. Engineer; Pu Sanjeep Mondal, Mech. Engineer, Poddar Infratech Pvt. Ltd. te'n an lo dawngsawng a; hna thawh hmabak la awmte leh pawimawh hrang hrangte sawiho a ni bawk.