2406/2024-2025

AIZAWL; the 7^th October, 2024: Vawiin chawhma dar 10:30 khan Making Aizawl Liveable and Safety City tih thupuiah hmangin Gov’t Aizawl College, Mualpuiah NATIONAL SYMPOSIUM ON VISION AIZAWL CITY AFTER 20 YEARS buatsaih a ni a, Aizawl Smart City Ltd. bultuma Symposium hi huaihawt a ni. UD & PA Minister Pu K. Sapdanga chuan khuallian niin Symposium a hawng.

Symposium hawnna thuchah sawiin, Pu Sapdanga chuan Aizawl khawpui hi khawpui naupang tak a la ni a, kawng hrang hrangah hmasawnna tur a tam hle  a. A pawimawh ber chu mitin ten kan rilru put hmangah hma kan sawn a ngai a ni, a ti.

College zirlai naupang te hnenah fuihna thuchah sawiin, Pu Sapdanga chuan vawiin kan rilru put hmang leh awm dan hian kum 20 hnuah Aizawl khawpui awm dan tur a hril thui hle dawn a, vawiin College Zirlai naupang te hian in fa te tan Aizawl khawpui hi chenna tlak leh himah a ni dawn em? tih ngaihtuahna chang in hriat a, in hmazawn theuhva thei tawp inchhuah a, hma in lak ve a tul hle a ni, a ti. Zirlai naupang te chu hna zawngtu ni lova, hna siamtu ni tum zawk tura chahin, rinawmna leh thawhrimna in hlawhtlinna a hringchhuak thin a. Sakhuana tel lo hlawhtlinna erawh in chapona a hring chhuak a, an tluchhe thuai thin a ni, tiin Pathian tihna nen, rinawm tak leh taima taka an koa mawhphurhna tla chu huai tak leh chhel taka hmachhawn zel turin zirlai naupang te chu a chah bawk a ni. Pu Sapa chuan hetiang Symposium buatsaih a ni hi lawmawm a tih thu sawiin, Symposium hian rah tha tak a chhuah ngei a beisei thu sawiin duhsakna a hlan bawk a ni.

Vawiin programme hi session 3: Inaugural, Technical session I leh II-ah te thenin, Session khatna hi Dr. Lalmalsawma Khiangte, HoD, Dept. of Political Science chuan kaihruaiin, Pu Lalbiakzuala, Principal GAC in “welcome speech” a sawi hnuah Pu CC. Lalchhuangkima, CEO, Aizawl Smart City Ltd. chuan khuhhawnna thu sawiin, tun atanga kum 20 lo la awm tura Aizawl khawpuiin harsatna a tawh theih tur hrang hrang te tarlangin, vawiin symposium-ah hian chutiang harsatna pumpelh dan tur emaw a sutkian dan tur te emaw chu mithiam hrang hrang ten technical session-ah an sawi dawn a ni, a ti. 

Technical session I-ah hian Power Point Presentation hmangin Pu HVL. Zarzosanga, Project Co-Ordinator, ASUTP in Vision for Urban Mobility, Pu Andrew Lalhruaia JD, UD&PA in Vision for Infrastructure in Aizawl After 20 years, Pu Lalremruata Kullai, JMC, AMC in Urban Local Governance after 20 years in Aizawl leh Prof. Benjamin L. Saitluanga, MZU in Vision for Aizawl Livable City after 20 years  tih thupuite hmangin zirtirna an nei a.

Technical Session III hi  zan dar 7:00 Pm a online a neih tur a ni a,Dr. C. Lalengkima, Asst. Professor, Dept. Pol.Sc. kaihruaina hnuaiah Ramengmawia Bawitlung, PhD candidate, Dept. of Humanities and Social Sciences, IIT Bombay chuan thusawina hun a hmang  dawn a ni.