2407/2024-2025
Aizawl, the 7th October, 2024: Sawrkar laipui Ministry of Social Justice & Empowerment chuan India khua leh tuite dikna leh chanvo neihte, midangin an palzut sak loh nan leh Dan tlawhchhana humhim a nih zawk theih nan theihtawp chhuahin hma a la thin a. Khua leh tui zinga transgender te'n certificate pawimawh an lak zung zung theih nan leh an puala Dan siam Transgender Persons (Protection of Rights) Act, 2019 & Rules, 2020 kaltlanga hamthatna awmte an dawn theih nan hemi kawnga inzirtirna leh inkawhhmuhna zau zawk siam hi Sawrkar laipui chuan a ngaipawimawh em em a ni.
Transgender Persons (Protection of Rights) Act, 2019 & Rules, 2020 leh an tana Scheme hrang hrangte inzirtirna leh bawhzuina kawnga hmalakna awm reng rengte chu kum tin vawi hnih tal State Sawrkar hnuaia Social Welfare & Tribal Affairs, Women and Child Development Department kaltlangin Sawrkar laipui Ministry of Social Justice and Empowerment-ah thehlut thin tur a ni.
1. Transgender Persons (Protection of Rights) Act, 2019 & Rules, 2020 hnuaia hriattur pawimawhte:-
a) Hemi Dan (Act) hnuaia section 4(2) chuan Transgender (TG) te chu eng gender nge an nih tih mahni an inpawmna chu an dikna leh chanvoah a ruat a. TG te'n Certificate/Identity Card an dilna tur National Portal for Transgender Persons (transgender.dosje.gov.in/) chu siam niin, Deputy Commissioner/District Collector-te chu heng certificate pawimawhte pe chhuak tura danin thuneihna a pekte n ni. June ni 28, 2024 thleng khan he portal hian tlawhtu mi nuai 40 chuang neiin transgender Identity Certificate 20,003 pek chhuah tawh a ni a. Hetih mek lai hian TG certificate leh card la pek chhuah hman loh (pending) 4,768 a awm tling bawk a ni.
b) Hemi Dan (Rules) hnuaia section 10(1) chuan Transgender tana hamthatna welfare scheme awmte tha taka kalpui a nih theih nan India rama State leh Union Territory-te chu Transgender Welfare Board (TWB) din vek turin a ti a. Hemi bawhzui hian June ni 28, 2024 thleng khan Mizoram tiamin India ram State/UT 18 ahte TWB hi din tawh a ni a; la din ve lote pawh ngaihpawimawh hmasaka neia din thuai tura tih an ni.
c) Hemi Dan (Rules) hnuaia section 11(5) chuan Transgender-te chunga pawikhawihna thleng thinte chak taka bawhzui a nih a, a hun taka case ziahluh, hnuchhui leh pawi khawihtu laka dan anga hremna lekkawh a nih theih nan State leh District tinah Transgender Protection Cell (TPC) din turin a ti a; State Level hi DGP leh District Level hi DC te'n an vil dawn a ni. June ni 28, 2024 thleng khan State/UT 9 te'n TPC hi an din tawh a; la din ve lote pawh ngaihpawimawh hmasaka neia din thuai tura tih an ni.
2. Transgender-te tana Nodal Department, Department of Social Justice & Empowerment (DoSJE) hnuaia hamthatna awmte:-
a) Support for Marginalised Individuals for Livelihood and Enterprise (SMILE):
He scheme hnuaiah hian sub-component 'Central Sector Scheme for Comprehensive Rehabilitation for Welfare of Transgender Persons' awmin, Transgender-te hamthatna tur hrang hrang- National Portal for Transgender Persons kaltlanga Transgender Certificate pek chhuahte, Transgender chenna baihvaite tana tlukluhna tur 'shelter home' ruahmante, hriselna kawnga an inenkawlna tur ruahmante, thimthial zirtir leh eizawnna zawn sakte bakah thliarhranna bik awm lova an tana hamthatna leh tuamhlawmna hrang hrang siamte a huam tel a ni.
b) Garima Greh Scheme:
Transgender baihvai leh inhumhimna mamawhte tana tlukluhna tur 'shelter home' siamna scheme a ni a. June ni 28, 2024 thleng khan India ramah Garima Greh 12 siam a ni tawh a. Delhi, Odisha, Gujarat, Tamil Nadu, Rajasthan, Bihar leh Chhattisgarh-ahte pakhat theuh a awm a, West Bengal-ah pahnih awmin Maharashtra-ah pathum a awm bawk.
