335/2024-2025 

Dated Aizawl, the 23rd April, 2024: Nimin khan Mizoram State Project Monitoring Committee (MSPMC) hmalakna hnuaiah an Vice-Chairman, Pu R. Lal Rinawma, IRS (rtd) kaihhruaiin Lengpui Airport a hmalakna hrang hrang awm mekte chu endikna neih a ni.

MSPMC Vice-Chairman, Pu R. Lal Rinawma chuan Lengpui Airport a hmunhma hrang hrang, a bikin building, electricity leh kalkawng chungchanga hmalakna awm mek te chu endikna a nei a. Hmasawnna la awm theih dan tur leh project awm laite changtlung leh chak zawka kalpui anih theih dan tur officials hrang hrangte nen a hmunah enfiahin an sawi ho a ni.

He hunah hian MSPMC Secretary Er. Vanlalruata Sailo leh MSPMC Team 'A' member pali:  George Lalzuia, Dr. K. Vanlaldinpuia, Pi Lalremsangi Fanai leh Er. Vanlalneiha Ralte te bakah Lengpui VCP ten an tawiawm a. Hei bakah hian PWD lam atangin Er. Lalrinngheta, SE (Planning), Er. Lalnunchama(Mech. Circle), Lalawmpuii, Sr. Architect; P&E lam atangin Er. Lalthazuala, EE ; PHE lam atangin Lalropuia, SE (PHE) te leh PWD(Highways) officials hrang hrangten an tawiawm a ni.

Mizoram State Project Monitoring Committee (MSPMC) hi Planning and Programme Implementation Department nodal-na hnuaia din niin Chairman chu Chief Minister a ni a. Vice Chairman leh Secretary awmin committee member tura ruat bik mai bakah political party, NGO leh pawl hrang hrang atangin mi 12 member tura ruat an ni a. An vaiin members hi tun dinhmunah 21 an awm a ni.

MSPMC thil tum ber chu Mizoram sawrkar hnuaia project hrang hrang awm mekte endikna neih a, changtlung leh tha zawk a kalpui dan tur zir chian mai bakah a hun taka zawh fel anih theih nan a hmalakna tur awm theite enfiah a rel fel a ni.