334/2024-2025 

Champhai, the 22nd April, 2024: Vawiin chawhnu dar 2:00 khan District Election Officer Pu James Lalrinchhana kaihhruaiin Lok Sabha Inthlanpui, 2024 vote thlak zawhfel taka hmalakna kalpui dan thlirletna leh lawmthu sawina hun DC Conference Hall-ah hman a ni.

District Election Officer Pu James Lalrinchhana chuan Lok Sabha inthlanpui vote thlak zawhfel hnu hun remchang hmasa berah hmalak dan thlirletna leh lawmthu sawina hun buatsaih a ni chu lawmawm a tih thu sawiin, hlawhtling taka inthlanna kalpui a nih theih nana mawhphurhna hrang hrang nei te'n tha taka an hlenchhuak chu ropui a tih thu a sawi a. Line Department hrang hrangte hmalakna leh ruahmanna siamte fakawm a tih thu sawiin, hneh taka mahni chanvo theuhte hlen a ni leh Champhai district-a thawhhona tha tak awm chuan hlawhtlinna min pe a ni, a ti a. Election kaihhnawih hmalakna puanzar leh vote thlak tura mipui zirtir kawnga Chanchinbumite hmalakna fakawm tiin, inthlanna langtlang leh rinngam neih a nih theih nana tel ve zel tura beisei political party te'n sawmna ngaipawimawha an tawiawm zel thin avangin lawmthu a sawi bawk.

Pu James Lalrinchhana chuan inthlan hmasa a tawnhriat atanga inzirin tunhma zawng aia felfai zawka inthlanna buaipui a ni chu fakawm tiin, hmalakna chhuanawm leh entawntlak tak takte a tarlang a. Mawhphurhna pek te'n tha taka an tipuitling zel thei chu chhuanawm a tih thu a sawi a. Model Code of Conduct a la nung reng thu leh dan zawm chunga kalzel a tul thu sawiin, inkaihhruaina siamte tha taka chhunzawm zel turin a chah a. Vote chhiar a la tul dawn thu leh hmalak dan turte ruahman chhoh mek zel a nih thu sawiin, kalkhawmte chu tha thlah mai lova, a tawp thlenga ruahmanna siamte tihlawhtling tura inpuahchah theuh turin a chah bawk.

He hun hi Election Officer Pu Benjamin Zalawma Ralte in kaihruaiin Dy. DEO Pu K. Zorammuana leh Nodal Officer, EEM Pu Lalrinawma te'n thu an sawi a. Nodal Officer leh Election Office Staff-te hnen atangin hmalak dante ngaihthlak a ni a. Rawtna leh hmasawn ngaihna laite sawi ho a ni bawk.

He hunah hian hmalaknate thlirlet niin, hmalakna chhuanawm tak tak zingah election training tha tak neih a ni te, inthlan hma tlaia Polling Station tlawhte, Traffic management felfai tak leh inbiakpawhna tha tak ruahman a ni te, a vawikhat nan Polling Station-ah Scouts & Guides an duty-te, buaina lian tham awm lova inthlanna felfai tak neih a ni leh hemi atana duty te'n tha taka hna an thawkte, inthlanna muanawm leh felfai tak buatsaih a nih theih nana mi pawimawh tak tak Police hotute, Senior Micro-Observer, Sector Officer, Sector Police Officer, Nodal Officer, Micro Observer, DC, DRDO, NIC leh DRO Staff, Polling personnel, Security personnel, BLO, LO, Election Expenditure Monitoring hnuaia team hrang hrang, Enforcement Agency, CAPF, MPRO, Political party, Media, MPF, Kohhran, NGO, CAMS, Scouts & Guides, SVEEP campaign tawiawmtute, Medical Team leh inthlan kaihhnawiha thahnemngai taka thawk hrang hrang te'n tha taka mawhphurhna an hlen chu chhuanawm an tih thu inthlan thlirletna leh lawmthu sawina hunah hian tarlan a ni.